India-a court chuan kum 2018-a Latvian khualzin pawngsuala thattu mipa pahnih chu an dam chhung lung in tang turin a hrem.
Kum 33 mi khualzin hi a laizawnnu nena India-a zin niin March 14, 2018 khan Kerala-a an thlenna resort atangin a bo a ni.
Ni 38 zet hnuah a ruang chu Kovalam khawpuia mangrove hmun kilkhawr takah hmuh a ni.
Amah pawngsuala thata puhin mipa pahnih man an ni a, pakhat hi khualzin hruai kual thin a ni nghe nghe.
Thiruvananthapuram-a sessions court chuan Thawhlehni khan thiam loh chantirin hremna pawh a tichhuak nghal bawk.
Thla ruk zet court hianh ngaihtuahin kum 32 mi, Umesh leh kum 28 mi, Udayakumar te chuan Latvian khualzin hi marijuana pein nasa takin ruihhlovin an hrai rui a, an pawngsual zui ta tiin thuremnaah hian tar lan a ni.
An pahnih hian Narcotic Drugs & Psychotropic Substances Act tlawhchhanin phal loh thil hralh leh hmang suala puhin thiam loh chantir an ni tel bawk.
Court thuremnaah hian ‘an taksa dam chhung’ lung in tang tura tih an nih thu ziah lan a ni.
Thiam loh chang pahnihte hian pawi an khawih ngei tih an inpawm tih police-ten an sawi laiin court-ah erawh an pha ve ve thung.
Court-a thu rem lai hi thi ta laizawnnu chuan online-in Dublin atangin a lo tel ve a, ani hi a laizawnnu a bo hlima police-in an zawn hmuh mai loh lai pawh khan online search campaign a lo huaihawt tawh a ni.
An unau hian khualzinte tlawh tam tak, Kerala-ah hian Ayurveda healing centre panin an zin a ni.
April 21 khan sangha mantu pahnihin hmeichhe ruang hi tawih chhe tawh takin an chhar a, a lu chu a bul ramhnuaiah an hmu bawk.
India-ah hian kum 2012-a Delhi-a bus chhunga nula pawngsual rawn leh thahna a thlen hnuah khan hetiang kaihhnawih hremna hi a na hle tawh.
Delhi-a thil thleng duh lohna hi nasa taka lantir niin sorkar pawhin pawngsual dona atan dan a tikhauh zual a, a titu chu thi tur thlenga hremna pek theih an ni.
Pawngsualna thleng hi chanchinbuten chhuah nasain dan thar pawh siam ni mah se hetiang thil thleng hi a kiam phah lo niin mi tam tak chuan an sawi tho.