Aizawl: Serchhip bialtu MLA Lalduhoma chuan nimin khan MLA fund hmanga Rs. nuai ruk (6) senga sak, Neihloha zirtirtu awmna tur quarter pahnih hawngin, ZPM an sorkar chuan zirtirtu hmun danga sawn chhuah theih loh post eng emaw zat siam a nih tur thu leh a khaw mi ngei zirtirtu atan lak tur an awm a nih chuan lak thin a nih tur thu a sawi.
Hawnna inkhawmah thu sawiin ZPM Leader Lalduhoma hian education department hnuaia zirtirtu, a bikin thingtlanga thawkten quarter an nei mumal lo a, in luah mai tur a awm lo thin chu harsatna lian tak a nih thu a sawi a. Budget-ah zirtirtute quarter sakna tur dah turin an nawr a, an sawi fo thin chungin, ngaih pawimawh a hlawh tawk lo thin niin a sawi.
“ZPM-in sorkarna kan chang a nih chuan zirtirtu – non tranferrable post eng emaw zat kan siam dawn a, chumi hnuaiah chuan a khaw mi ngei, transfer duh ve lo tur lak an ni ang. Chu chuan thingtlang lama zirtirtu leh zirlaite harsatna tawh thin a siam that ngei kan beisei,” a ti.
Neihloh khuaa Teachers Quarter sak nan hian bialtu MLA chuan a fund atangin Rs. nuai 6 a pe a, hemi hmang hian Govt. Neihloh Middle School hmunah Assam type-in zirtirtu chenna tur in, a dung feet 38 leh a vang feet 25-a lian, kaw hniha luah theiha sak a ni.
ZPM Neihloh Unit President C. Lalduhawma kaihhruai inkhawmah hian bialtu MLA bakah, Neihloh VCP Pianmawia leh Neihloh Branch YMA President Hranghmingthanga ten thu an sawi bawk.