Aizawl: Thawhtanni tlai khan Excise & Narcotics Department (END) chuan Thenzawl Field Vengah heroin gram 87.540 (hawng 6) leh a neitu nia puh mi pathum – Vanneihtluanga (20), Lalrinliana (37), Vacha Dil Veng, Thenzawl leh Lalrinkimi (25), UPC Veng, Thenzawla khawsa nia inchhalte an man.
Ruihhlo vanga mante hi The Narcotic drugs & Psychotropic Substances Act, 1985 tlawhchhanin thubuai siamsak an ni a, court-ah thawn nghal an ni.
END hian heng ruihhlo leh a kaihhnawih man chhuah a nih theihna atana Thenzawl Branch YMA ten an puihnaah an chungah lawmthu a sawi.
END chuan tunlaiin ruihhlo dona kawngah dan kengkawhtute leh CADS, Central YMA te’n thawhhona tha tak neiin hma an la mek zel tih sawiin, Mizo mipuiten thlamuang taka Krismas leh Kumthar lo thleng an hman theuh theihna turin ruihhlo leh hemi kawnga pawikhawihtute dap chhuahna kawnga thahnem ngai theuh tur leh dan bawhchhiatna emaw, bawhchhiatna tura hmalakna hria emaw, an awm chuan a rang thei anga thuneitute hriattir turin Mizo mipuite a ngen.