Aizawl : Press tour-a Meghalaya tlawha thang mek Kolasib DIPRO leh Kolasib district MJA member ten nimin khan Shillong-a Deputy Residential Commissioner Lalchhanhima an kawm a, DRC chuan Mizoram House hnathawh tlangpuite a lo hrilhfiah.
DRC chuan revenue chi hnih – room rent leh inner line permit (ILP) atanga sum an lakluh thin thu sawiin, room rent bik chu kum 2014 vela rate siam tawh an la rin thu leh ennawn a ni dawn hnai nia sawiin, room rent atanga sum hmuh chu hman heu theih a nih loh thu leh Mizoram sorkara chhunluh vek tur a nih thu a sawi.
Shillong Mizoram House-in sum a lakluhna dang pakhat chu temporary inner line permit atangin a nih thu DRC chuan sawiin, “ILP siamna atan Rs. 350 an la a, heta tang hian Rs. 50 chu administrative expense atan hman niin, Rs. 300 chu sorkar revenue-a dah tur a ni” a ti.
Shillong Mizoram House hian kumin April – November ah room rent atangin Rs. 10,32,155 a hmu tawh a, hemi hun chhung vek hian ILP atangin Rs. 61,500 an hmu tawh bawk.
Kolasib DIPRO leh Kolasib district MJA member te hian nimin vek khan Shillong chhehvela Agriculture department hmalakna thenkhat, Alu chinna hmun te leh thlai dang chinna hmun te pawh an tlawh a, Deputy Manager, NEEPCO Lalhlimpuia’n NEEPCO VIP Guest House-ah chhun chaw a lo buatsaih sak a ni.