Mizorama 5G network hman a nih thuai theihna tura hma la tura din -Working committee for roll out of 5G network- chu nimin khan ICT Minister Robert Romawia Royte hovin an thukhawm a. ICT Minister chuan Krismas thilpek atan Aizawl leh Lunglei khawpuiah tal kumin chhunga 5G network hman a nih theih na tura theihtawp chhuah turin Telecom service provider te a ngen.
ICT Minister chuan Mizoramah 5G hman a nih thuai theihna tura chak zawka hma la tura Telecom service provider te chu ngenin, harsatna an neih chuan theihtawp chhuaha a puih tur thu leh a tul tulah puih a inhuam thu a sawi a. A kaihhnawih sorkar department hrang hrang, a bikin P&E Dept., UD&PA Dept., AMC leh PWD leh a dang te an pawimawh zual thu sawiin, theihtawp chhuaha hmalakpui turin a sawm.
Sorkar thuchhuahin a tarlan danin kumin November ni 25 khan sorkar laipuia Department of Expenditure-in special assistance to state for cap- ital investment (SAC- SI) 2022-2023 hnuaiah Mizorama district leh block zawng zawnga telecom tihchangtlunna atan Rs. vbc 50 a sanction a. Hei hian Mizoramin internet connectivity tha leh zual a neihna atan hmasawnna ropui tak a thlen ngei beisei a nih thu sorkar thuchhuah chuan a tarlang.
Secretary, ICT department Lalramsanga Sailo-in -working committee for roll out of 5G network- chu Mizoram sorkarin kumin October ni 31-a a din a nih thu sawiin, Mizoramah 5G network, fifth generation telecom network technology, internet speed chak leh bandwidth sang tak hman a nih thuai theih na tura hma la tura din a nih thu a sawi a. “5G hi kan hmang thei a nih chuan mipui nitin nun leh khawsakna bakah – health, education, banking, agriculture, rural development, governance, public service delivery leh industry-ah te pawh hmasawnna tam tak thlen theitu a ni dawn a ni” a ti.
He thutkhawmah hian Reliance Jio company aiawh ten Aizawl-ah 5G network pekchhuahna remchang tur hmun 56 an thlan thu leh hmun 30 te chu an survey tawh thu an sawi a. Airtel company pawhin Aizawla hmun 54 vel an ruahman thu an sawi bawk.