Aizawl : Lunglei district Congress committee (LDCC) President KL Chhawnzauva’n eng hun- ah pawh Lunglei Municipal Council (LMC) inthlan hmachhawn turin an inpeih niin a sawi.
LDCC President chuan LMC chungchangah party anga inrawnkhawmna a awm hre lo mahse, sorkarin hma a lak avangin an inbuatsaih mai tih sawiin, “inthlan an tih hun huna inthlang mai turin LDCC chu kan in peih a, MNF sorkar hian an election manifesto a nih angin inthlan chu an buatsaih ngei tur ah pawh kan ngai” a ti.
Mizorama sorkar lai chu an term chanve vel atangin mipuiin an lakah beisei tur a awm lo tih hriain an hawisan deuh vek tawh niin LDCC President chuan a sawi a. Sorkar leh tum awm pawhin an awm lem lo nia sawiin, a theih ang anga inhaivurin mipui an rapsawr mek ni bera a hriat thu leh theih ni phei sela chuan Zoram mipui chu an dahkham duh hial a rinawm niin a sawi.
LDCC President chuan tunlaiin Lunglei khawpui chhung veng hrang hrangah VC ten an pawisa khawl ve te hmangin veng chhung kawngte siamin an blacktop hlawm nia sawiin, sorkar leh bialtu MLA atang pawh- in hmalakpuina a awm lemlo niin a sawi a. Lunglei khawpui chhung kawngpui chu Lunglei pa PC. Lalthantluanga (ELTY Construction)-in tlawmngaih chhuahin a ba in a siam nia sawiin, “a ni ang hi nei lo ta ila chuan kan kawngpui hi siamthat hun a awm kher awm love” a ti.
Tlawmngaia Lunglei khawpui chhung kawng siamtu chuan a ba ringawt chuan hna a thawk reng thei bik lo thei tih sawiin, sorkar chu pawisa pechhuak thuai tura an duh thu LDCC President chuan a sawi bawk.
PWD-in ATL road siam tha tura hma an lak meknaah Mizo tlangval chhawr tur (labour) an hmuh mai loh avangin Jharkhan lam mi an chah a ngai hial niin LDCC chuan a sawi a. Mizo thalaite inngaihtuah chian a tul hle nia sawiin, “ram tan eng hna pawh thawk thei turin rilru siam thar ila, that loh theih lohna bawma kan awm hun hi a nghahhlelhawm takzet” a ti bawk a ni.