Mizoram Pradesh Congress Committee (MPCC) chuan December. 2018-a MNF sorkar a pian hnuah Mizoramah rorelna fel hmuh tur a awm lo nia sawiin, “MNF sorkar hnuaiah dan ang taka rorelna a bo zo a, Mizoram dinhmun a chhe takzet ta a ni,” an ti.
Nimina an thuchhuahah tun hnaia Mizoram tlawhtu, Union Minister of State John Barla chuan Ministry of Minority Affairs hnuaiah Rs. vaibelchhe 1,000 chuang Mizoram sorkar hnenah pek a ni tawh a; mahse, Mizoram sorkarin sum hman dan report (utilisation certificate) pek tur a nei lo tih thu a sawi a. Union Minister of State, Food Processing Industries leh Jal Shakti enkawltu Prahlad Singh Patel pawhin Rs. vaibelchhe 75 senga siam, Kolasib district-a Mega Food Park-in a rilru a tihnat thu a sawi nia tar langin, heng zawng zawng hi MNF tihchingpek vekah an puh.
Lunglei Zohnuaia Science Centre sak mek, Rs. nuai 65 senna tur, PWD-in an thawh mek chu CM leh an bialtu MLA duh dan angin civil mi, HS Laltlanzara, Zotlang, Lunglei chu work supervisor atan ruat a ni chu sorkar kalphung kalh tlat niin, MNF sorkarin dan an zah lohzia leh sorkar hnathawkte an rin lohzia tilang chiangtu niin an sawi.
MNF sorkar hnuaiah hian dan lo a hnathawh, dan loa hnathawktu lak leh dan bawhchhiatna chi hrang hrang a hluar niin an sawi a. MNF sorkar hnuaiah smuggler-te an zalen mai ni loin, MNF hruaitu lawk tak takin an thlavang an hauh zawk emaw tih tur a nih bakah, drugs a hluarin, Mizo thalai tam tak drugs hmansual vangin an thi mek a, chhungkaw tam tak mangang takin an rum mek thu an sawi bawk.
Sum leh pai enkawlna chungchangah MNF sorkar a hlawhchham let derah puhin, “Sum leh pai hman dan fel lo lutuk avangin Mizoram chu leiba thang (debt trap)-ah a tang chho mek a, sorkar hnathawkte hlawh leh pension pawisa te, healthcare bill thlengin pek theih a ni lo a. Hetiang taka sum leh pai enkawlna a hlawhchham sorkar hi Mizoramah a la awm ngai lo,” an ti.
Congress party chuan MNF sorkar kal dan en hian Mizoram siamthat tum aiin tihchhiat vek an tum emaw tih mai tur a nih thu an sawi a. MNF sorkarah MLA tha tak tak, mi thiam tak takte awm bawk mah se, CM Zoramthanga leh a chekawiten che thei miah loa an siam avangin MLA a din zui phur loh phah an awm nual niin an sawi.
“MNF sorkarna hnuaiah Mizoram dinhmunin chhiat lam a pan zel a, dinhmun chhe lehzuala kan luh loh nan a rang thei ang bera MNF sorkar hi paih thlak an ngai a ni,” an ti.