Ukraine chu Thawhtannia Russia-in missile hmanga nasa taka a kah leh hnuah an power grid-te a him zawk nan emergency shutdown an kalpui mek tih President Volodymyr Zelensky chuan a sawi.
Power off hian region eng emaw zat a nghawng tih a sawi a, tual chhung thuneitute chuan Kyiv region zahve aia tam mah chu electric nei lo thei dinhmunah an ding mek tih an sawi tih a sawi bawk.
Thawhtannia beihna an tawhah hian mi pali an thi bawk.
Zan lamah pawh Moscow hian bei zuiin chhim lama Zaporizhzhia khawpui bula power hmunte chu kah a ni tih thuneituten an sawi.
Hetih lai hian Thawhlehni khan Russia-a Kursk region governor chuan drone hmanga an airfield beihnaah tuialhthei an dahkhawlna a kang tih a sawi.
Online-a video thehdarhah chuan meikang nasa tak bakah a khu dum tak van lama chho nguai nguai pawh hmuh tur a awm.
Mihring thi an awm lo niin Roman Starovoyt chuan a sawi a; mahse, sikulte chu ni hnih chhung chawlh an puang nghal tih a sawi a. Ukraine nena inria awm region-a beihna thleng hi tute tih nge tih erawh a sawi lo.
Ukraine-ah thung chuan energy minister chuan Russian-te beihna avanga an power tlakchhamna chu Thawhlehni zan atang chuan a ziaawm tan a beisei thu a sawi a, nuclear power station atangin grid-ah an pe chhuak leh thei tan tih a sawi.
Ukraine-ah hian thlasik a na tan hle a, region tam takah vur tlain tui khang theihna khawp a ni mek a, mi maktaduai telin electric leh tui an nei lo va. Khaw vawt vanga thi an awm hlauhthawnna a lian hle.
Russian-ten Thawhtannia an kah leh hma hian Kyiv thuneitute chuan emergency-a power tihtawp a tul thin thu an sawi a, hei hian darkar eng emaw zat a awh thin a. Hei hi mipuiin an power mamawhte daihzai zawka sem a nih theih nana tih a ni tih an sawi.
Moscow hian Ukraine-a power grid-te hi October 10 atang khan an bitum a, a hmain indona mualah an sipaite an hnungtawlh duai duai thung.
Khawthlang ram hruaitute chuan an chet dan hi dan bawhchhiatna niin an sawi a, civil mite mamawh tihchhiat chu a dik lo tih an sawi.
Mi thiamte chuan Russia chet lak dan hi mipui nuai tumna a nih thu an sawi a, sipai chakna hmanga indonaa chak tumna lam pawh a ni lo niin an sawi.
Moscow erawh chuan hetiang rilru an put loh thu an sawi ve thung.