Aizawl: United Pentecostal Chirch of North East India, Aizawl East District chuan Thawhtanni zan khan Vanapa Hall-ah ‘No Tobacco Week’ an hawng a. He huna khuallian, Health Minister Dr R Lalthangliana chuan thu sawiin, vaihlo leh a kaihhnawih thil hian mihring dam hun chhung nasa taka a pawhtawi avangin, sim a pawimawh tih a sawi.
Khuallian chuan mihringte dam hun chhung hun bituk chu kum 70 a ni a, chakna avangin kum 80 pawh a ni thei tih a ni a, a bak hun hi chu a tlem tawh hle tih sawiin, “Vaihlo leh a kaihhnawih thil hian kan dam hun chhung nasa takin a pawt tawi a, a ti thinte pawhin kan sim hram hram a pawimawh takzet a ni. Kan lo hrisel zawk nan Mizote hian a tui a piang ei lo in, a hrisel leh leh hrisel loh ngaihtuah hmasa thin ang u,” a ti.
Health minister hian Mizoram chu India rama state ralmuang ber niin, ziak leh chhiar thiam tamna leh Kristian tamna state a nih laia cancer leh HIV/AIDS tamna state a ni chu a lungchhiatthlak thu a sawi.
Hriselna hloh chu engkim hlohna a ni tih chu thupuiah nei se a duh thu sawiin, zuk leh hmuam hian sum bawm a tiral chak em em a, nghei vek thei se Mizoramin hma a sawn phah a rin thu a sawi a. Zuk leh hmuam dona kawngah peih rei/daih rei a ngai a; a tawp thleng turin kalkhawm te a chah.
‘No Tobacco Week’ hawnnaah hian Rev. KVL Hmangaihkima, District Superintendent hnen atangin week hawn thuchah ngaihthlak a ni a, Rev. R Laltlankima’n report a pe a, Rev. H Lalropuia’n lawmthu sawiin hun a khar a ni.