Saudi Arabian club Al-Nassr chuan World Cup zawhah Portugal forward Cristiano Ronaldo chu lakluh ngei tumin an bei a, kum khatah Euro maktaduai 200 hlawh tir an tum.
Ronaldo hi club engemaw zat ngaihventu nei a ni a, mahse tun dinhmunah Al-Nassr sawmna hi a lian ber a ni a, langsar taka dawrtu awmchhun an ni.
Kum 37 mi Ronaldo hi thla hmasa a Manchester United in a contract an tihtawpsak hnuah free agent a ni mek.
Ronaldo hian nipui laiin Saudi Arabia club hnen atangin Euro maktaduai 350 vel man hu contract ziak tura dawrtu an awm tih a lo sawi tawh a. He sawmna hi pawm se khawvela footballer hlawh hnem ber chiang tak a ni ang.
Tun dinhmunah erawh Ronaldo hian World Cup khellai an nih avangin club contract lam a ngaihven rih lova. World Cup zawh hnu lamah chiah a hma hun a tichiang dawn niin thu a thang bawk.
Al-Nassr lam pawhin Ronaldo hi contract an la ziahpui lo tih an sawi ve bawk a. “Ronaldo lakluh duhtu kan ni a, kan player duh tak a ni. Club dangte ang bawkin keini pawh hian lakluh tumin kan bei a, mahse tunah rih chuan World Cup chauh a ngaihtuahnaah a awm tih kan hria.” tiin an sawi.
Ronaldo hi free agent ni lai nimahsela transfer window hnuhnung ber a inkharin Manchester United-ah contract a la neih avangin club thar tan January 1 a nih hma chu contract thar a ziak thei lo.