Aizawl : ZPM President Lalliansawta chuan, Mizoramah political party tih theih 30 vel ding tawh zingah sorkarna siam chu tlemte an nih thu a sawi a, Sorkarna siam tawhte pawhin mipui sorkar ni loin party mite chauh lenna sorkar an siam niin a sawi.
Nimina Aizawl West-I bial chhunga ZPM Block thar, Block-II hawnna Sairanga neihah thu sawiin Lalliansawta chuan, Mizoram hian bung thar, bung thumna a chuangkai dawn niin a sawi a. Pakhatnaah Lal neih lai, khuain lai huaisen, lal tha an neih chuan khaw mi ten malsawmna dawngin, a khua pawh a lo pung thur thur thin. Lal fel lo, rethei leh pachhia te ngaihsak lo, lal inluling thin an neih chuan mipuite an rethei thin tih a sawi a. Pahnihnaah chuan political party a lo piang hi ni lehin, kum 76 vel lai politic party hruaiin Mizo mipuite awm tawh mah se, vawiin thleng hian mipui sorkar ni loin party mite chauh lenna hmun a nih thu sawiin, “Tunah chuan mi tin huapzo, mipui sorkar siam turin ZPM kan lo lang ta a, Mizoramin bung thar pathumna chuangkai turin kan inbuatsaih mek a ni,” a ti.
Mizoramah political party tih theih mai chu 30 vel lai ding tawhin, sorkarna siam chu tlemte nia sawiin, “Heng sorkarna siamtute atanga kan hmuh chu party sorkar a ni thin. NLUP te, SEDP te leh a dang dangte pawh kan han ti a, mahse, party mite bak a huam hleithei lo. A nihna takah chuan heng pawisate hi a neitu diktak chu mipuite kan ni,” a ti bawk.
Lalliansawta chuan kalphung thar, mipui sorkar reiloteah a ding dawnin a lang tih a sawi a. ZPM hian Pathian leh mipui zarah sorkar a siam a nih chuan mipui sorkar din an tum tih sawiin, “Kum 76 chhung zet kalkawng kan lo zawh bel tawh em em party politics, party sorkar hi siamthat kan tum a ni,” tiin, tunah hian ZPM boruak a kang chho chak hle a, an hotute kalna piangah mi thar lawmluh a za tel teh meuh an nei zel a, party lehlam atanga lo ngaithlatute dul hnawkna khawp tur hi a thleng reng tih a sawi.
Er. Vanlalneiha Ralte, General Secretary, ZPM General Headquarters kaihhruai inkhawmah hian Lalthansanga, Ex-MLA, Vice President, ZPM pawhin thu a sawi a ni.