Barcelona khawpui daia rel pahnih insu avangin mi 155 velin hliam an tuar niin emergency services chuan an sawi.
Rel hi Spain hmarchhaka Catalonia region-ah Nilaini zing dar 7:50 (India-a chhun dar 12:20) velah station-ah an insu a ni.
Tual chhung chanchinbute chuan rel hi an kalna lam tur inang ve ve an ni a, pakhat chuan station-a lo ding lai pakhat chu a su niin an tar lang.
Catalan police chuan thil thlen dan hi an chhui mek.
Chhiatna hi khawpui laili atanga km 12 vela hla, Montcada i Reixac – Manresa station-a thleng a ni.
Emergency services thuneitu, Joan Carles Gomez chuan mi 155 hliam an awm thu leh an zinga mi 14 chu damdawi inah inenkawl zui tura lak an ni tih thuthar lakhawmtute hnenah a sawi.
“Vun kak leh lu lam sawhte an ni hlawm a, na lutuk an awm lo,” a ti a, passenger thenkhat chu an ruh lam khawih a awm em tih endik an ni tih a sawi bawk.
Gomez-a chuan rel hi an insut lai hian muang changin an tlan niin a sawi a; mahse, a chhunga dingte chu an insut khan tluin an indelh hlawm a, chu chu an nat chhan a ni hlawm tih a sawi bawk.
Regional fire service thupuangtu chuan rel kal lai, a sutu zawk hian a hmaa rel hnung lam a su niin a sawi.
Insutna thleng avang hian rel kal vel chu eng emaw chen a khaihlak phah a; mahse, dan pangngaia tlan leh theih a nih tawh thu Catalonia region sorkar chuan a sawi.
Passenger pakhat chuan Ser Catalunya chanchinbu hnenah an thil tawn sawiin ‘na takin min sawi’ a ti a, ‘mite chu an te tuarh hlawm’ tiin a sawi.
Passenger dang pakhat chuan ‘mi thenkhat chu thisen an kai a; mahse, pilh nen nuan chauh an ni thung’ tih BBC hnenah a sawi bawk.
Spanish Transport Minister Raquel Sánchez-i chuan thil thleng chu ngun taka an ngaihven reng thu leh hliam tuarte chu ‘rang taka dam chhuak leh turin’ duhsakna a hlan.