Sorkar thupekin Aizawl khawpui leh district khawpuiah te eirawngbawlna gas home delivery kalpui chhoh mek a ni a, kalphung thar kalpui hi tha titu an awm laiin, a semtu lam erawhin point delivery nen kalkawp thei se, consumer duhthlannaah innghat se an duh thung.
Supply department chuan December 1, 2022 atanga gas home delivery kalpui turin thupek a tichhuak a, sorkar thu zawmin distributor thenkhat chuan kawtkaia gas sem turin hma an la a, hetihlai hian veng zawng zawngah erawh kalpui vek a la ni lo thung.
The Zozam Times zawhna chhangin Mizoram Indane Distributors Association (MIDA) General Secretary V. Lalzawmliana chuan kawtkaia gas sem hi distributor-ten a taka kalpui turin hma la mah se an huam chhungah zawng zawng vawilehkhata kalpui theih a nih rih loh thu a sawi a, MIZOFED-in point delivery nen an la kalkawppui tih a sawi.
V. Lalzawmliana chuan home delivery kalpui tur hian distributor leh consumer lamin tih tur tam tak an nei a, mobile phone number-te nen inthlunzawmte a ngai a, “Thawktu indaih tawk lohna nen, chak taka hmalak a harsa,” a ti.
Mizoram chu tlangram a nih avangin kawtkaia gas sem hi harsatna a awm a, tuna an kalpui chinah pawh chak taka sem chhuah a harsat phah tih a sawi.
Gas inpek dan chungchangah hian consumer-te chu an dah lal ber thu V. Lalzawmliana chuan a sawi a, “|henkhatin point delivery hi an la duh a, home delivery duh tawkte pawh an awm tho a, chutah chuan consumer-ten duh an thlan theih nan home delivery leh point delivery hi kalkawp thei se,” a ti.
MIDA lamin kalphung tharin harsatna a siam nia an sawi lai hian Mizoram Consumer Union Vice President C. Laldawngliana erawhin gas home delivery hi mipui tan a awlsam a, thil tha tak a ni tih leh sorkar thupek chu an thlawp tlat thu a sawi ve thung.
The Zozam Times-in a kawmnaah C. Laldawngliana chuan, “Gas home delivery kalpui a nih hian gas nghei hlau reng renga kan awm thin hi a tireh tawh ang,” a ti a, hmun kilkhawr leh hla tak tak tan pawh gas rit tak put a ngai tawh lo chu thil tha tak a nih thu a sawi.
India ram chhung state dangah pawh gas home delivery chu kalpui vek a ni tawh a, state danga an lo tih ang mipui tana awlsam zawk hi Mizoramah tha taka kalpui a nih theih an beisei a, hemi atan hian distributor lamte pawh an inhawn a tul hle nia an ngaih thu a sawi bawk.
Supply department lam chuan thupek an tihchhuah chu distributor lamin an zawm chho zel nia an hriat thu an sawi a, IOCL dan hnuaiah chuan point delivery system hi a awm loh thu leh Mizoramin a remchan dan anga hun rei tak a lo kalpui chu pawm mah se tunah erawh an kalphung pangngai anga home delivery kalpui tura a tih tawh thu an sawi.
Supply department hotute chuan kalphung thar kalpui a nihin buaina a awm ziah thin thu an sawi a, tuna gas home delivery kalpui chungchangah pawh thla thum vel chu distributor leh consumer lamte chu an buai ngei an rin thu an sawi a. Chutihrualin pilot project-a an lo kalpui tawhna vengten tha taka an kalpui chhunzawm theih tawh ang ngeia tuna titharte pawhin an kaltluanpui an rin thu an sawi bawk a ni.