- Ramhluna Hnamte
Band ropui the Beatles ho an vanglai taka an han keh darh thut mai chu an fans ten an ui tak zet a nih kha. 1960 ah Liverpool ah in dinin sixties hun lai hi chu rock rimawi khawvel a an vanglai, khawvel rimawi kalphung pangai rawn chawk danglam vek khawp a Beatles music thalaiten an atchilh chhoh lai a ni. Kum sawm dawn zet Rock rimawi khawvel a an vawk lal len ngut ngut hnuah anmahni karah neuh neuh a lo awm ve tan a, mal lar duhna hri te pawhin a man ve hlawm a ni mahna, 1970 chuan ‘officially’ in Beatles band a tawp tawh thu an puang ta a nih kha.
Tichuan mahni seh seh mual hranah tiin solo project an han bei ta theuh a, a mal malin karlovah charts number 1 kai hla an nei nghal fur mai a nih kha. Member dangte chu tun tumah chuan dah tha in an hmuipui pu ber John Lennon chung chang kan thlur bing ang a, chutah pawh a hla ropui ‘Imagine’ tih hi thiam ang angin kan chhui dawn a ni.
Khatia an han kehdarh tak hnu khan John Lennon hian album puitling(LP an ti bawk) a buaipui nghal a, chu album hming chu ‘Imagine’ tih hi a ni. Amah leh a nupui Yoko Ono te produce a ni a, May ni 21,1971 ah John Lennon-a Home studio ah recording tan a ni. An final na tak erawh chu Record Plant, New York City ah a ni thung, chu chu July 1971 kha a ni. ‘Imagine’ album chu September 1971 ah release a ni ta a, he album atang hian a album hming putu ‘Imagine’ chu October 1971 ah single in USA ah released a ni leh ta a ni. Billboard Hot 100 chart ah number 3 a kai nghal a, a album pawhin hemi kum vek November thla hian UK ah number 1 a kai ve nghal bawk. John Lennon album tihchhuah tawh zingah chuan ‘Imagine’ album hi hralh tam ber leh sawi leh sel hlawh ber niin an sawi. UK ah hian ‘Imagine’ hi single a official taka released a ni lo na in 1975 khan Lennon hla thenkhatte nen ‘compilation album’ angin an released leh a, khami kum khan chart ah number 6 a kai bawk. John Lennon hlaah chuan ‘Imagine’ hi hralh tam ber a ni a, UK ah ringawt pawh copy maktaduai 1 leh nuai 6 an hralh a ni.1980 December ni 8 a New York a John Lennon kahhlum a nih khan ‘Imagine’ single hi an hralh leh nasa hle a, chart ah number 1 a kai leh hial.
Tunhma chuan kei pawh hian ‘Imagine’ hla hi ‘Kristiante tan chuan sak leh ngaihthlak fo chi a ni lo e’ ka lo ti ve thin a. A tlar hmasa ber a ‘Imagine there’s no heaven……no hell bellow us’ han tih teh ngawt mai thleng han chhiar leh ngaihthlak hi chuan a ‘anti-Christian’ em bawk a ni. Mahse a thu han ngaihthlak emaw han zir chian hi chuan John Lennon tum bul pui ber chu khawvel a remna tluantling a awm theihna tur a a duhthusam a auchhuah pui na a lo ni daih si a nih hi.
Lennon-a’n ‘Imagine’ a phuah lai vel hi Vietnam war vung chhoh lai vel kha a ni a. American mipui tam zawkin Vietnam war a America sorkar in rawlh kha an duh lo a, an ning a, an protest nasa em em a. Heng hun lai a Hippies an tih ho te khan thupuiah ‘Make Love not War’ tih te leh remna leh muanna tlangaupuina thu hla(slogan) an uar hle thin. Lennon-a pawh hi khawvela remna leh muanna awm theih dan tur buaipui a vei em em tu a ni a. A hla pakhat ‘Give Peace a Chance’ tih phei chu Hippies ho hla pui ber a ni thin nghe nghe a ni. Chuti khawpa khawvel a remna leh muanna duhtu John Lennon chuan he a hla ropui leh hit kai ber ‘Imagine’ hlaah hian hremhmun leh vanram awm leh awmloh lam nilo in khawvelah hian remna tluantling lo awm tawhse, khawvel mi chi hrang hrang mi ngo, midum, mi eng te leh sakhaw hrang hrangte, ram hrang hrangte leh hnam hrang hrang te hi rin hran leh ram hran leh hnam hran nihnate dah tha a pumkhat nih a duh zia a au chhuah puina a ni a, ‘Chu hun chu ka nghakhlel a ni, dawn ve teh u’ ti a min auhna a ni zawk.
Ram hrang leh ram hrang, in er leh indo buai reng maite, in pawng nekna leh sakhuana avang a thihchilh bomb tih puah leh in phiarrukna hrang hrang vang a tualthahna te hi kan hnam hrang nihna kan lak thupui lutuk vang leh sakhaw hrang kan vawn fur vangte hi a ni a. Sakhaw hrang hrangte hi awm lo in khawvel pumpui hi ram pakhat angin awm ta mai ila, han dawn ve teh, a va nuam dawn em. Muslim leh Hindu, ui leh kel thlun pawlh ang mai, in hal em em reng mai te, Israel leh Palestinian indo reng mai te, Kristianten tihduhdahna avanga thihna leh manganna an tawh nasat ziate, sakhaw lian zawkin a te zawk an nek chep nasat ziate hi ka duhthusam ram a thlen hunah chuan a bo vek tawh dawn a ni.
“Mihausa leh rethei kar a zau ta lutukte, mi duham leh pamham, mahni hmasial, sum pathian a bia leh sum leh pai ngah pui pui, thilsual tih vanga hausak pawh pawisa chuanglo ho, a diklo zawng a an hausakna hmang ho te avang hian kan chenna khawvel hi a va chep sawt tak em ! Duhamna avanga mihausa ten sumdawn nan a ramngaw tha pui pui suat a, thing leh mau nungchate kan suat rem zel mai te hi ka suangtuahna khawvelah chuan a bo tawh ang. Chu ka suangtuahna khawvelah chuan sakhua bik pawh awmlo, ram leh hnam bik pawh awmlo in lei mihringte hi unau angin, in hal miahloin, lungrual em em in kan leng za tawh ang a, hausa bik leh rethei bik pawh awm tawh chuanglo in kan neih kan ei za ang a, aw, chu hun chu dawn ve teh, a va nuam dawn in a va nghahhlelhawm em!
“Mahse ‘I suangtuahna khawvel mai a ni’ tiin thu tak hla takah min ngaih sak vak lo a ni rih mahna, ngawi tak rawh, engtik hunah emaw chuan he ka ngaih dan hi min la rawn hriatthiam puiin min la rawn tawmpui ve ngei ka beisei tlat, Dawn ve teh,” tiin John Lennon hian he a single ropui leh hlawhtling ber ‘Imagine’ hla hi a phuah a lo ni zawk.
A ni ngawt mai, he khawvel a inthliarna leh intih bingna nasat tawh zia te, thu chhete in chuh vanga ram leh ram indona lian tak lo chhuak thin te, sakhaw in anloh vanga indona te, mihausa in mirethei leh hnuaihnung zawk an awpbeh nasat ziate ngaihtuah chuan John Lennon duhthusam hi chu ka tawmpui khawp mai. Kan ram zimte pawh hi lo thlir ta ila, Kristian theuh theuh, denomination in anloh avangin kan inkhawm ho thei tawh lo a, kan Pathian thu sawi pawh kan in ngaihthlak sak duh tawh manglo a, kan in sawt a, kan in deu a. Kan mihausa thenkhatte lah an source of income pawh hriat mang siloh a lo hausa ta thur thur lah an pung tual tual a, chung mi hausa ho chuan mi chuanhnuai zawkte an la chapo khum ta lai a, min hmusit a, min raphrual ta a ni ber a. Kohhranah pawh kan biakin ropuina te, kan population tam berna te, kan hausakna te kan chhuang ta zawk a, kan huang chhunga mi rethei leh chanchhe zawkte chu a nawlpui zingah pawh an awm ve ngam ta manglo a ni ber a. Heng mite tan hlei hlei hian John Lennon-a hla ‘Imagine’ hi lo thleng dik se, inthliarna awm reng renglo, in unau a in pum khata khawvel pakhata chenho hun hi an tan hian a va nghahhlelhawm dawn em ! Dawn ve teh !
“Imagine no possessions, I wonder if you can,
No need for greed or hunger, a brotherhood of man,
Imagine all the people, sharing all the world”…Lennon, John (circa 1971)