Honda Mizoram Premier League Season 9 chu khar a ni a. Final inkhel hmuhnawmah Chawnpui FC chak zawkah tangin a vawikhatna atan Mizoram champion an ni.
Thawhlehni zana Rajiv Gandhi Stadium a inkhelah hun pangngai leh hun pekbelhah 2-2 in team pahnihte an inhnehtawk a. Penalty hmanga chak zawk zawnnaah 5-3 in Chawnpui an chak.
Lalsangzuala Hmar hnuaia khel Chawnpui in an striker rinrawl MC Malsawmzuala hmangin minute 16-na leh 28-naah goal an khung a. An dinhmun a tha nghal.
Mahse Venghnuai tan Vanlalthanga’n halftime dawnah freekick pet lutin H. Lalrempuia chuan an goal hnihna second half-ah a khung a. Lalrindika Hmar pawlten a tul huna insiamrem an thiam tih an tilang.
Penalty hmanga chak zawk zawnnaah Chawnpui tana pettu panga in an khung vek a. Venghnuai tan Lalruatfela pet chu Chawnpui goalkeeper Lallawmzuala’n a save sak a. Team pahnih inkara danglamna a ni.
Chawnpui hi MPL-ah an champion vawikhatna a ni a. An coach Sanga’n MPL-ah team pathum head coach angin a champion puina a ni thung.
MPL9 final-ah hian All India Football Federation president Kalyan Chaubey chu khuallian a ni a. India international hlui Chaubey hian Mizoram sorkar a inpeih phawt chuan MFA nen an pathuma thawkhovin Mizoramah high performance centre din tura hma an lak tur thu a sawi.
Champion : Chawnpui FC, Rs 6,00,000 + MPL Trophy + Medals
Runner Up : FC Venghnuai, Rs 3,30,000 + Medals
3rd Place : Rs2,20,000
4th Place : Rs1,60,000
5th Place : Rs1,35,000
6th Place : Rs1,10,000
7th Place : Rs85,000
8th Place : Rs60,000
Fairplay : FC Bethlehem, Rs 20,000
Mimal lawmman :
Best Goalkeeper : F. Lalmuanawma (MPFC) Rs 5,000 + Trophy
Best Defender : Lalruatfela FCV) Rs 5,000 + Trophy
Best Midfielder : K. Vanlalhriata (CPFC) Rs 5,000 + Trophy
Best Forward : MC Malsawmzuala (CPFC) Rs 5,000 + Trophy
Top Scorer : MC Malsawmzuala (10 goals), Rs 5,000 + Trophy
Best Player : Lalrinchhana Tochhawng (CPFC), Rs 5,000 + Trophy + OnePlus Smart TV