Aizawl: Mizoram Police chuan kumin chhungin Mizoram hmun hrang hrangah dan lova Myanmar atanga kuhva tawlh ruk Rs 4,92,79,675 hu man tawhin ip 4,522 bakah, nylon bag tê chi 20 an man tling tawh.
Nimina an thuchhuah danin Aizawl, Champhai, Khawzawl, Saitual, Serchhip, Hnahthial, Kolasib, Mamit district chhungah Myanmar kuhva dan loa phurh luh man ni tawh a. Heng district zingah Hnahthial leh Kolasib district-ah chauh hian mihring man leh thubuai ziah luh a awm a. Hnahthialah hian thubuai ziah luh awm loin mi pakhat man niin, Kolasib-ah thubuai panga ziah luh niin mi pasarih man an ni tawh a. Hetih lai hian Lawngtlai, Lunglei, Siaha district chhunga kuhva phur man an la awm lo thung.
Myanmar kuhva dan loa phurh luh hi Champhaiah man hnem ber niin ip 187 (kg 12,050 kg) niin Rs. 22,68,000 man hu a ni a, hei bakah nylon bag tê chi 20 man a ni tawh bawk.
Mamit-ah ip 1,075 (86,000 kgs) Rs 2,21,25,000 hu, Kolasib-ah ip 935 (33,300 kgs) Rs. 33,40,000 hu; Saitual-ah ip 920 Rs. 73,02,875 hu; Khawzawl-ah ip 570 (28,500 kgs) Rs. 65,55,000 hu, Aizawl-ah ip 408 (27,840 kgs) Rs. 65,28,000 hu; Serchhip-ah ip 357 (19,820 kgs) Rs. 10,48,800 man hu leh Hnahthial-ah ip 70 (2,800 kgs) Rs. 1,12,000 hu man ni tawhin, a vaiia belhkhawmin ip 4522, Rs 4,92,79,675 man hu an man tawh a ni.
Mizoram Police chuan tunah hian district hrang hrang magistrate-ten an district chhunga dan phal loh kuhva rah phurh luh leh district kaltlanga phurh khapna order (u/s 144 CrPC) tichhuak tawhin, dan lo a kuhva rah phurh titawp vek tur hian theihtawp an chhuah zel dawn a, dan bawhchhiatna chi hrang hrang dona kawnga beihpui an thlaknaah mipui thlawpna an ngen a, hetianga dan lo a kuhva rah phur hria chuan mahni kuta dan kenkawh tum mai loin, police leh thuneitute hrilh vat zel thin turin mipuite an ngen a ni.