Aizawl : Government Aizawl College Fest chu College Courtyard, GAC Mualpui Campus, Salem Veng, Aizawlah nimin khan Sports & Youth Services Minister Robert Romawia Royte-in a hawng a, Gym room leh Basketball court te a hawng nghal bawk.
Robert Romawia Royte chuan college zirlaite chu an nundan vawng fel turin a chah a. Thiamna tak tak nei tur chuan zirtirtute leh zirlaite inkarah inhriatthiamtawnna leh inngaihsaktawnna tha a pawim- awh thu sawiin, inlai- chinna tha neia hmalam pan turin zirlaite leh zirtirtute a chah.
“Tunlai khawvelah ‘hriatna leh thiamna hi thiltihtheihna a ni’ tih hi a dikzia kan hmu chho mek zel a, chutiang tur chuan hma in la mek a ni” tiin, Robert Romawia chuan thiamna leh hriatna lakkhawmna (source) erawh a dang tawh hle tih a sawi a. Zirlaibu aimahin social media hman uar a nih tawh vangin social media hman danah fimkhur a ngaih thu leh thudik leh rintlak chauh chhiara, post thin turin zirlaite chu chahin, rilru hriselna bakah leh taksa hriselna ngaipawimawh turin a chah.
India sorkarin infiamna lam a ngaihpawimawh thu leh Mizoram sorkar pawhin hma a lak nasat thu sawiin, Sports Minister chuan Sikul, College leh University-ah pawh infiamna tha dah a nih thu leh dah belh leh zel tura hmalak a nih thu a sawi a. Zirlaite chu HIV/ AIDS do kawngah pawh mawhphurna an nei a ni tih hriaa, he natna vei lo tura intiam ngam tur leh midangte hnena ‘awareness’ pe theitu ni turin a sawm bawk.