Arsenal forward Gabriel Jesus chu Cameroon nena an inkhelh tuma a khup a tihnat chu zai a ni a. Brazil tan World Cup-ah a khel chhunzawm thei tawh dawn lo.
Kum 25 mi Jesus leh a teammate Alex Telles te he inkhelah hian an inhliam ve ve a. Jesus hian he inkhel hi Qatar a starting XI a chan hmasak ber niin a hma in substitute bench atangin vawi hnih a khel tawh.
Arsenal chuan, “A khup dinglam hi Cameroon nen an inkhelh tuma a tihnat avangin zai a ni a. Tunah hian a dam lehna tura inenkawlna kalpui tan nghal a ni ang. Club chuan Gabby hi a thlawp tlat a, a inkhelh leh thuai theihna turin theihtawp a chhuah dawn.” tiin an sawi.
Jesus chawlh chhung tur hi sawi tel ni lo mahse a khup dinglam a tha awm a tihnat avangin thla thum vel tal chawl tura ngaih a ni.
Pound maktaduai 45 a Manchester City atanga nipui laia Arsenal pantu Jesus hian a club thar tan goal nga a khung tawh a, match 11 goal khung tawh lo nimahsela a thawhrimna leh tumruhna te Mikel Arteta team in an chhawr tangkai hle.
He inhliam avang hian senior team-ah Eddie Nketaiah leh Gabriel Martinelli te chiah tlarhma a rin theih tur an neih dawn avangin January bazarah an chet mai phah ring an awm.