Aizawl: Lunglei South AC bialtu MLA & Vice Chairman, Bamboo Development Board Dr K. Pachhunga chuan Thawhlehni zan khan TOA Conference Hall-a Lunglawn Branch YMA Education Committee buatsaih Zirlai Ti Tha Chawimawina hun a hmanpui.
R. Lalnghaksanga kaihhruai inkhawmah hian Lunglawn, Lunglei zirlai matric, HSSLC, graduate leh post graduate pass zirlai ti tha mi 41 an chawimawi.
HSLC pass 60% chung lam hmu, HSSLC pass 75% chung lam hmu leh graduate chung lam chin university Top 10-a langte chawimawi an ni. University level topper-te hnenah MLA Award hlan an ni bawk.
Dr K. Pachhunga chuan Zirlai Ti Tha Chawimawina buatsaihtu Lunglawn Branch YMA Education Committee fakawm a tih thu sawiin he chawimawina program hian nghawng tha tak neiin zirlaite leh an nu leh pa te tiphurtu leh chona thar siamsaktu a nih ngei a beisei thu a sawi.
Zirlaite chu tum mumal neia chhungkua, khawtlang leh ram tana chhawr tlak nih tum turin a chahin sorkar hna piah lamah eizawnna dang – sumdawnna, mahni kutkawiha eizawnnate ngaihven tel turin a chah a. An hma hun lo kal zel turah a eng zawna thil thlir thiam thin tur leh an zirna leh hnathawhna dah pawimawh hmasa thin turin a chah bawk.