Aizawl: TJ Lalnuntluanga, Minister-in Zofate hian inpumkhat taka hma a lakho zel chuan Zofa zawng zawngte hi rorelna hnuaia awmho hun a la her chhuah ngei a beisei thu a sawi.
Nimina Mizo Zirlai Pawl (MZP)-in a buatsaih, Sialsuk-a Zofest 2022-ah khuallian niin TJ Lalnuntluanga hian a hmanpui a. MZP-in Zofate inpumkhatna kawng a zawh tlat chu lawmawm a tih thu sawiin, “Khawchhak leh chhim lama kan unaute harsatna tawh mek puih kawnga Zofaten kan phak tawk theuha thil kan tih mekte hi a ropuiin, heng harsatna kan tawh mek leh kan inpuih zelna hian pumkhatna nasa zawk leh inunauna nasa zawk min pek phah ngei ka ring,” tiin, unau ni tura Pathianin duan dan hi a taka kalpui zel a tul tih a sawi.
TJ Lalnuntluanga chuan, “Min beitu pawn lam mi beih ngai miah loin chungril lamah kan buzawlah, kan hmanraw duhlai ngei hmanga kan inbeihna leh kan intihchhiat tawnna hi kan chhiatpui ang tih a hlauhawm takzet,” a ti a. ‘An ti’ tih mai mai hmanga inbeihna avangin mi tam tak rin loh phah te, social media hmanga ram leh hnam chhe ta vek anga tar lanna te hian mahni inhmuhsitna khawpin hnam leh sakhua hi a hruai thleng mek hi siam that a pawimawh niin a sawi.
Ngaihtuahna dik hmanga hmabak theuha dikna leh rinawmna vawng tlat a, hnam tana rinawm leh thahnemngai, inpumkhatna rilru pu tlat mi nih a tul tih a sawi a. Hnam dang hmasawnna ruhrel lian tak nei tawhte nena inkhaikhin hian thil tangkai miah lo, beidawnna leh inpumkhatna tichhe zual tur a thlen mai a hlauhthawn thu sawiin, “Zofate hian inpumkhat taka hma kan lakho zel chuan Zofa zawng zawngte hi rorelna pakhat hnuaiah kan awmho hun ala herchhuah ngei ka beisei,” a ti.
Salai Lian Luai, ex-CM, Chin State, Myanmar pawhin Uaptu niin he hun hi a hmanpui a. Mizo mipuiten hmangaihna nena raltlante a puihna leh a tuamhlawmnaah lawmthu a sawi a. “In tel loa awm thei lo keinite hi min hre reng tur leh kan Jerusalem Mizoram hi a nihna taka inlantirna hian Pathian khawngaihna a takin a pho lang a ni,” a ti.
Sawi zawm zelin, “Unau kan nihzia lantir zel nan inpawhna tha zawk kan neih nan Mizo tawng pawh kan zir mawlh mawlh mek. Manganga kan rawn raltlan laiin, kan zinga mi thenkhatin thil duhawm lo an ti leh thin pawh hi pawi kan tiin, hetiang ti lo tur hian kan infuih reng a, a tiluite avang hian in mi hriatthiamna ka dil tak meuh a ni,” tiin, inpumkhatna kawnga MZP hmalakna chu thinlung takin lawmawm a tih thu leh hmasawn zel turin duhsakna a hlan.
He hunah hian Lalnunmawia Pautu, President, MZP chuan Legal Study Forum buatsaih ‘Chin Kuki Hills Country’ lehkhabu chu a tlangzarh.
Zofest 2022 hun hnihna hi Chinkhanmanga Thomte, Asst. Gen. Secy. MZP-in a kaihruai a. Hun hnihna tan hma hian khuallian TJ Lalnuntluanga hian Zofest 2022 lungphun, Sialsuk tlang bul thuta phun chu a hawng a ni.
Zofest 2022 hi naktuk hian neih chhunzawm leh tur a ni ang a, December 9, 2022 khian kharna neih a ni ang.