ZPM thalaiin “Kan CM-in a sawi, damlo apiangin an dawn tur SEDP sum Rs 2,00,000 kha khawiah nge a awm?” an ti a. Healthcare inrelbawlna atana mipui sum dah Rs. vaibelchhe 7 chuang hman ral a nih chhan pawh zawtin, kumin Krismas hmaa Healthcare bill tang te pechhuak vek turin sorkar an phut bawk.
ZPM thalai President Dr. C. Lalrammawia’n nimin khan thuthar thehdarhtute kawmin heng thu hi a sawi a. Healthcare-a inziahluhna sum hman dan chungchang chu RTI hmangin Health department-ah kumin October ni 5 khan an zawt tih ZPM thalai chuan sawiin, November ni 1-ah chhanna an dawng tih an sawi.
Dr C Lalrammawia chuan RTI hmanga an zawhna chhannaah chuan “Mizoram State healthcare scheme-a inziahluhna sum te chu administrative expenditure/sorkar inrelbawlna – zinna senso, thawktu hlawh, training pekna, office inrelbawlna leh a dangte-ah hman a nih thu tarlan a ni tih sawiin, “a bang la awm chu healthcare bill tang pek chhuahna atan hman a nih thu tarlan a ni” a ti.
Healthcare atana mipui sum dah, thil danga hman a nih chu pawi an tih thu ZPM thalai President chuan a sawi a. November ni 7, 2022-ah healthcare inziahluhna sum te sorkar inrelbawlna atana hman a nih dan kimchang RTI hmang bawka an zawh leh thu leh December ni 6, 2022-ah chhanna an dawn thu sawiin, an zawhna channaa a lan danin ni 1.10. 2020 atanga healthcare-a inziahluhna sum, sorkâr inrelbawlna atana hman tawh zawng zawng Rs. 7,28,89,880 a nih laiin, hemi hun chhung veka healthcare inziahluhna sum atanga healthcare bill tang pek chhuah chu Rs. 3,21, 65,987 chauh pekchhuah a nih thu a sawi a. “Damlo bill 1158 chauh an cover a ni” a ti.
ZPM thalai President chuan Damlo bill tang rulhna tur sum puk a nih leh nih loh an zawhna chu puk a nih loh thua chhan an nih thu a sawi a. “RTI chhanna atang hian mipuite sum thawhkhawm hmangin MNF sorkar hnuaia healthcare kalpui a nih danah mipui rahbehna nasa tak a awm a, sorkarin mipui healthcare sum a bat erawh ṭhahnem tak a ni” a ti a. September ni 21, 2022 thlengin health care bill tang 29302 awmin, bill tang zawng zawng belhkhawm Rs. 80,54,44,879 a nih thu a sawi.
Healthcare-a mipui te inziahluhna sum hman dan chuan sum enkawl kawnga MNF sorkâr hlawhchham zia leh MNF sorkârin mipui hriselna a hlamchhiah zia a tichiang niin ZPM thalai President chuan a sawi a. Mizoram sorkar chu Healthcare-a mipuite inziahluhna sum a hnathawkte hlawh leh inrelbawlna atana pe tawh lo tur leh Healthcare-a mipuite inziahluhna sum chu a nihna ang taka hmang tawh turin an phut bawk.