Kau-Tlabung Hydel Project leh Tuipang lui Mini Hydel Project sum eiruk thubuaia thiam loh chantir, PWD engineer-in-chief hlui, Liansanga chu kum hnih chhung lungin tang tur leh Rs nuai 15 chawi tura hrem a ni.
Special Court Judge Dr HTC Lalrinchhana chuan Nilania thiam loh a chantir tak, Liansanga hremna tur chu nimin khan a puang a, kum hnih tang tur leh Rs. nuai 15 chawi turin a hrem a, pawisa chawi tur a neih loh chuan kum 15 dang lung in tang turin a ti bawk.
Eiruk thubuaia thiam loh chantir tak hi bail theih a ni a, a ukil-ten judge hnenah hian bail an dilsak a, vawiinah bail a dilna chu court-in a ngaihtuah leh ang.
Special Court Judge Dr HTC Lalrinchhana chuan hremna a puannaah Liansanga chu kum upa tawh, sorkar hna atang pawha pension tawh a nih avangin a hremna chu a na lo thei ang ber pek a nih thu a sawi a ni.
Liansanga ukil-te chuan Special Court PC Act-in Liansanga thiam loh a chantir chungchangah court sang zawka kal ngei an tum thu thuthar thehdarhtute hmaah an sawi a ni.