Equatorial Guinea sipai hmunpui, Bata khawpui bula thil puak nasa tak avangin mi 17 vel an thi a, mi dang 400 chuangin hliam an tuar bawk niin thuneitute chuan an sawi.
Pathiannia Bata khawpuia thil puak hi sipai hmun bul lawka lo neituten an thlai hnah ro vel an halna atanga intan, sipaiten a bul maia fimkhur lo taka dynamite an dah niin an sawi.
President Teodoro Obiang Nguema chuan a bul hnaia building leh chenna inte chu a chhe deuh vek tih a sawi.
Sorkar television chuan in chim karah hian dam an awm leh awm loh zawn hna leh senghawi hna thawh mek a nih thu a puang.
In chim vel karah hian mi eng emaw zat an tan rin a ni a, thi pawh hi an pun ngei a rinawm hle.
President Obiang Nguema chuan thuchhuah a siamah Nkoantoma military base-a fimkhur lo leh inthlahdah takin, a him dan tur ngaihtuah miah lova dynamite leh puak thei dang chheh a nih vang a nih thu a tar lang.
Sipai hmunpui bul lawka lovah lo neituten an lo an hal a, chu chuan sipai hmun hi kang kaiin puak thei dah khawmte a man a, chhiatna nasa tak a thleng ta tih a tar lang a. President hian ram dangte puihna a dil nghal bawk.
Health ministry chuan damdawi inah mi 420 enkawl mek an nih thu Twitter-ah a tar lang a. Damdawi thiam, mahnia inpe theite chu Bata Regional Hospital pan turin an ngen bawk.
Ministry hian tlawmngaia thisen pe turin mipuite an sawm bawk.
Sorkar TV chuan damdawi in thenkhat chu damlo tam lutuk avangin an indaih lo tih a puang a. Damdawi in chhuata damlo dah ringawtte pawh a tilang bawk.
Thil a puah hnu lawka video lak tihdarhah chuan mipui chiai mangang tlanchhiate chu meikhu dum takin a bawh nasa hle a. “Thil puak kan hria a, mei khu kan hmu bawk a; mahse, eng nge tih ber tur pawh kan hre lo,” tiin tual chhung mi pakhat chuan AFP news agency hnenah a sawi.