Aizawl : MIZORAM FIRST pawl huaihawtin nimin khan ‘Sumdawnna hmanga inchimral theihna kawng’ tih thupui hmanga sawihonaah, Mizorama hnam dang sumdawng an inpharhzau tawhzia sawi lan a ni.
Aijal Club-a sawihonaah hian ZR Thahmingliana’n thupui sawi hawnna neiin, panelist atangin Prof. Vanlalchhawna, MZU, Lalhmachhuana, Vice President, CYMA leh PC Laldinthara, President, MIMA te’n thupui an sawi a. Political party hrang hrangte, sorkar department, CYMA, AMC, ATC, AICS, MZUSC, MURSA, MSU, leh MRM atangte in aiawh kalkhawmin sawihona hlawhtling tak neih a ni.
He hunah hian Mizo hming hawha vai sumdawng an tam thu leh Mizo ngeiin an hum thin thu sawichhuah a ni a, hei hi hnam phatsanna a ni tih hriat a tul thu te, sum um avanga in leh dawr luah tura Mizo aia vai duhsak hi Mizo hnam hmalam hun atan a pawi thei hle tihte an sawi.
Sumdawnna hmanga chimralna hian khawtlang nun, hnam nun leh sakhaw nun thlengin mi a nghawng theih avang leh Mizoram chhehvela hnam chimrala awm tate avang hian harh a hun tawh zia te, Mizote hi sumdawnna kawngah dik tak leh hnam dang aia Mizo duhsak a pawimawhzia te sawi chhuah a ni bawk.
Hei bakah hian mipui, official leh sorkar-in an tihtur theuh ti tura an tan tlan loh chuan Mizo hnam hi chimral mai theih dinhmun hlauhawmah a ding tih chu kalkhawm zawng zawngte pawm tlan leh sawi a ni a, ram leh hnam damna chu mi mal tinah a innghat a ni tih tarlan a ni bawk.