Aizawl FC chuan Hero I-League a an match ruknaah Manipur club NEROCA FC an mikhual a. 1-0 in hnehna an chang.
Rajiv Gandhi Stadium a inkhelah hian Aizawl FC tan Japanese defender Akito Saito chuan inkhel a goal awmchhun a khung a. Point thum hmuh nan a tawk.
NE derby-ah hnehna
NEROCA hi Aizawl FC tih lova India hmarchhak football club zinga I-League a tel hlun tawh an ni a. Coach Khogen Singh hnuaiah season liamta khan league-ah pasarihna an ni a. Tun tumah pawh point khat a Aizawl FC aia sang zawk niin Mizoram an lo kal.
Dam lohna avanga head coach Stanley Rozario a ban tak hnuah assistant coach Victor Lalbiakmawia chuan team a siksawi a. Tlarhmaah Henry Kisekka chu R Ramdinthara leh K. Lalrinfela ten an thlawp a. Midfield-ah Lalramsanga, Lalchhanhima Sailo leh R Lalthanmawia te an inkawp.
Aizawl FC in ball an chang hnem zawk a. Chance chiang tak erawh nei lo mahse Lalthanmawia leh Lalrinfela ten goal khungna remchang an nei ve ve.
Halftime dawnah Kisekka chuan goal khung mahse foul avanga pawm a ni lo bawk.
Second half-ah erawh Aizawl FC in corner atangin goal an khung a. Lalthanmawia corner chu Akito Saito-a’n minute 60-naah goal-ah a khung.
Hnehna an chan avangin Aizawl FC hi paruknaah an chhova. Point 8 an hmu mek.
Tun Pathianni chawhnu hian league a pahnihna ni mek, season tha hmang Sreenidi Deccan nen Hyderabad-ah an inkhel leh ang.