Aizawl: Parliament thlasik thutkhawm neih mekah Rajya Sabha MP K.Vanlalvena chuan Zero Hour-ah thu sawiin Mizoram leh Tripura-a lo neitu tam tak kuhva chingtute harsatna tawhte a sawi.
K. Vanlalvena chuan kum tam tak kal tawh atangin Mizoram leh Tripura tlangmi mipui tam takin kuhva chin hi eizawnna pui bera an hman thin thu a sawi a. State pahniha kuhva chingtute hian vanduaithlak takin kumin chhung hian India ram state dangah an kuhva thar an hralh theih loh thu sawiin, Mizoram leh Tripura loneitute thar chhuah kuhvate chu India sorkar, Ministry of Home Affairs thupek hmuin Assam sorkar mi leh sa ten Assam ram chhungah lo tidingin an lo man thin tih a sawi.
Official thenkhatte report-a a lan dan chuan South East Asia ram atanga kuhva ro tam tham tak Myanmar kaltlanga India ram a lo luh thu leh heng hi central sorkar chuan tihtawpa lo danchah a tum niin a hriat thu Mizoram MP hian a sawi a. Ram dang atanga kuhva lo lut tihtawp chu tha a tih thu leh North East mite kuhva thar chhuah erawh chu India ram khawi hmunah pawh zalen taka hralh chhuah phalsak tur a nih thu te, foreign kuhva leh India ram kuhva chu hriat pawlh loh tur a nih thu leh, hmarchhak bial hi ram dangah an ngai a nih si loh chuan helai bial atanga kuhva tharte chu zalen taka hralh chhuah a ni tur tiin a sawi bawk.