Aam Admi Party (AAP) Mizoram chuan Sarkawtuichhuna mahni anpui kawp thinte awmna, LGBTQI Shelter sak tum a ni chu an duh lo a, do zel an tum.
AAP Mizoram hruaitute chuan nimin khan Aizawl Press Club-ah chanchinbumite an kawm a, India ram chhunga Kristian state tia inchhal awm chhun, Mizorama LGBTQI Shelter sak tum a nih chu an duh lo tak zet tih an sawi a, “He hmalakna hi a theih ang angin do zel kan tum,” an ti.
State dangah chuan LGBTQI Shelter hi lo awm pawh ni se Kristian state-ah kher erawh a awm an rem ti thei lo tih an sawi a ni.
AAP hruaitute chuan an party chu kum 10 leka upa ni mah se tunah chuan national party a lo ni ta tih an sawi a, “Gujarat inthlana MLA kan neih tak avang khan national party kan lo ni ta a, Gujarat mipuite thawhrimna chu kan chhuang hle a ni,” an ti.
AAP hian Mizoramah pawh tantu a neih belh zel a, MLA candidate tur mi dik leh huaisen an zawng mek tih an sawi bawk a, kum 2023-a MLA inthlanpui lo awm turah hnehna an chan ngei theih nan hma an lak mek thu leh bial 40 awmah a tlem berah bial 25-ah tal chuan candidate neih ngei an tum thu an sawi bawk a ni.