Aizawl: Excise Minister Dr. K. Beichhua hoin nimin khan Mizoram Excise & Narcotics Service Association (MENSA) General Conference vawi 18-na chu Commissionerate, Conference Hall-ah hman a ni.
Conference hi Zohmingliana, President MENSA-in a kaihruai a, F Zothanzuala, General Secretary-in report a pe.
Excise Minister Dr. K. Beichhua chuan thu sawiin excise enforcement chu tlem hle mah se an hnathawh ropui a tih thu a sawi a, “Kum 2021 leh 2022-ah a zawnin Governor’s Award an dawng thei chu lawmawm a tih bakah excise department hmel timawitu an ni,” a ti.
Dr K. Beichhua chuan Mizoramah ruihhlo do chu excise department mawhphurhna a ni tih hre thar a, ram hmelma do turin tlem emaw, tam emaw ngaihtuah loa theihtawp chhuah zel turin a chah nghal bawk.
Excise & Narcotics Department Commissioner Ngurchungnunga Sailo pawhin thu sawiin, “Excise force-te chu transfer & posting chungchangah buai loa khawi hmunah pawh thawk thei tura tuarchhel tur a ni,” a ti.
MENSA Conference-ah hian an member kum hmasa lama thi ta mi 15-te ralna hun hman a nih bakah conference puala a vawi khatna atana buatsaih magazine, ‘Mellung’ tih chu khuallian hian a tlangzarh nghal bawk.