India-a sumdawnna khawpui, Mumbai chuan tun hnaiah boruak chhia leh him lo tak an tuar ve mek a, ‘very poor’ huang chhungah an awm.
Ram khawpui ber, Delhi chu thlasik hun lai apiangin mihring tana hlauhawm khawp boruak bawlhhlawh a zin nasatna a ni bawk.
Mumbai hi vaukama awm a ni a, hei vang hian thli a tam avangin boruak bawlhhlawh pawh a awm ve vak ngai lo va; mahse, tun kar chhungin Delhi-a boruak aia a that loh tum a tam a ni.
Mumbai khawpui hi Indian khawpuite zinga boruak bawlhhlawh nasat lama thang chak tak a ni thar ve mek.
Mi thiamte chuan rang tak taka in leh thil dang sak te, khaw awm danin a zir loh leh lirthei khu pung ve zel chu tun hnaia sumdawnna khawpuia boruak a thianghlim loh zual chhan niin an sawi hlawm.
PM 2.5 level an tih, boruaka mihring tana thil hlauhawm, chuapa boruak lut tur dang thei leh natna dang dang thlen thei chu Zirtawpni zing dar 8.30-ah khan 308 zet a tling phak a, hetih hun lai hian Delhi-ah chuan 259 chauh a ni thung tih sorkarin a chhinchhiahnaah tar lan a ni.
Level-ah hian 200 leh 300 inkar chu tha lo (poor) huanga dah niin 300 leh 400 inkar chu tha lo tak (very poor) huanga dah a ni thung.
Indian khawpui lian dang dang – Delhi, Kolkata, Kanpur leh Patna-ah te pawh PM 2.5 level hi a him chin aia sang vek a ni hlawm.
Air quality index (AQI)-ah chuan 0 leh 50 inkar chu tha (good) huang a ni a, 51 leh 100 inkar chu ‘la awm theihna’ huanga dah a ni.
Indian khawpui liana boruak thianghlim lo lutuk hian mipuite hriselna a nghawng nasa hle a. Lancet-in an zirchiannaah chuan India-ah hian kum 2019 khan mi maktaduai 2.3 chuang zet chu boruak thianghlim lo an hip luh avangin an dam chen tur pangngai an dam thlen zawh loh phah niin an sawi.