Real Madrid in Brazilian rawlthar inlar thar an ngaihven ngawrh lehnghal viau a. Palmeiras atangin Endrick chu lakluh tumin indawrna an kalpui.
Kum 16 mi lakluh nan hian Euro maktaduai 72 velin an indawr niin an sawi a. Hmun thenkhatah an inrem tawh a, player hian kum nga contract a hman tur a ziak lawk ang tiin an sawi.
Club pahnihte hi an inrem a nih pawhin Endrick hian kum 18 a tlin hma chu Madrid hi a zawm thei dawn lova, kum 2024 hma Spain lam a pan thei dawn lo tihna a ni a. A contract ziah pawh July 2024 atanga hman tan tur a ni ang.
Club pahnihte an inrem tawh avangin Endrick-a insawnna tur hi contract leh mimal inremna lam an tihfel hunah an puang chiang dawn niin an sawi bawk.
Endrick hian Euro maktaduai 60 a leichhuah theihna a nei a. Real Madrid lam hian inremna an neih ran zawk theih nan leh club dang an inrawlh loh nan Euro maktaduai 12 pek belh an inhuam.
Feet 5 leh inches 8 a sang vei khawr striker pawl pet dik tak Endrick hian October 6 khan Palmeiras first team tan a vawikhat nan kum 16 leh thla hnih leh ni 16 chauh a upa niin a khel tan a. October 25 khan Athletico Paranaense lakah goal hnih a khung a, Brazilian Serie A chanchin a goal khung thei naupang ber dawttu a ni.
Palmeiras first team tan vawi sarih khel tawhin goal thum a khung tawh a. Youth football a khelhlai atanga hriat hlawh niin 2022 Copa São Paulo de Futebol Júnior-ah a chetthat avangin Europe club lianten an ngaihven tawh hle.