Himachal Pradesh assembly inthlana an chak hnuah Congress party chhungah buaina a awm mek a, an party worker thenkhat, chief minister atana Pratibha Singh-i duhtute chuan an hruaitu pakhat an dang.
Singh-i thlawptute hi Oberoi Cecil, Shimla-ah inhawr khawmin party hotu sangten chief minister tur tifel tura an tirh zinga mi, Chhattisgarh Chief Minister Bhupesh Baghel chu an lo dang.
Video-ah chuan worker-te hian Baghel-a car hi an din hual a, Singh-i an duh thu an aupui a. Singh-i hi Congress MP niin Himachal Pradesh inthlanah hian a campaign nasa em em a, inthlan erawh a chuh lo.
Congress hian chief minister tur tifel turin Zirtawpni tlai khan an thukhawm a. An thutkhawm hma hian Singh-i chuan, “Tumah inlahrang kan awm lo,” a ti.
Singh-i hian chief minister nih a duh thu pawh chiang takin a lo sawi chhuak tawh bawk.
Nikuma a pasal thi ta, Virbhadra Singh hminga hnehna chang an nih thu a sawi a, “Pi Sonia-i leh High Command-in kan inthlan hmaa party hruai tura min tih angin kan state hi chief minister niin ka hruai theih ngei ka inring,” a ti a ni.