- David Zochhuanmawia (Vida Hrahsel Saza)
Mizoram hi Kristian ram kan in ti a, chu mai ni lovin zaa za (100%) Kristian ram kan inti hial thin a nih kha! Kum a ral zel a, kumthar kan chuângkai zel bawk a. Pathianin hlim a phal a, kan hlim a, kan nui a, kan lâm bâwk bâwk a. A dik e, tu fa mah sawisel thiang lo, tumah hauh tûr lah awm chuang lo. Duh zâwng inang lo awm khawm Zofâ kan ni vek thung lawi a! Lum chuan lum law law a, vawh chuan vawh law law hi a Kristian zia zâwk em? Gospel hmai kâwr vuah kan tih ang chi ai kha chuan nihna ang taka lang ngam Kristian hi kan mamawh tawh zâwk emt Sual nei lo chuan dêng rawh se!
Rûnin kan awm kan ti a; Mizoramah Zofâ aia tam Hnam dang an la thahnem si lo. Tu hian nge min chîm ral a, tu hian nge kan hnam chu phatsan thin a, tu hian nge kan hnam ti mualphot Bengsika ngaihtuah a hun ta e. “Kan duh duhin kan tal a, kan dâwn thui si lo.” tha kan in ti theuh a, that dan dang thiau kan ni bawk si. Pawn lam lan dan kan thlir a. Kan hmel, kan hmâi kan phih fova, a then chuan phih satliah duh tâwk lovin an in ti ngo a (Intih ngona Drip te pawh khai tûr a awm tawh niâwm tak a ni); Pathian siam aia uchuâk tak takin kan in hnawih pherh a, chhungrilah kan nêp ru fû lawi si!
Khawi atangin nge insiamthat bul kan tan ang a, engtin nge hmâ kan sawn ang? Hmasawnna kan tih hian changkanna a keng tel a. Mahse, “Mahni neih tâwk baka changkan tumna hian rualawhna thangah min âwk mek,” a nih hi. Ka thalai pui hausa nia inngai tam tak hian an retheih bul intanna a ni tih an dâwn si lo. Sum ngah hi hausak tehna a ni ngawt lova, sum neih tlem pawh rethei tehna a ni chuang hek lo. Napolean Hill chuan, “Mifing leh fing lo tehna chu a ‘THILTIHAH’ a ni,” a lo ti a, a dik ngawt mai. Mahse, kan thiltih aia kan fin leh fin loh tehna chu Pathian kan tih leh tih lohnaah hian a innghat thuiin ka hre ta. Hausak tum hmasak ai chuan Pathian hnen ata finna zawn hmasak hi a hlu daih zawk a, chu chuan nun hausa a pe bawk ang che.
Lalpa tawngtaina kan sawiin, “nitin kan eikhawpin chaw min pe ang che,” kan ti a. Nitina kan eikhawp bak kan dil ngai lo. Hausakna kan dil lova, retheih pawh kan dil hek lo. Mahse, Khawvela awm kan nih miau avangin Pathian chuan kan tana tha tûr ang zia zelin ro min rêl sak a. A then an hausa ang a, a then an rethei ang a. Kan tawpna tûr erawh a thuhmun vek si ang. Engpawhnise, ka sawi belh duh pawimawh deuh chu, “I ram lo thleng rawh se” tih hi a ni a. Pathian ram kan tih, a Lal ram tak tak hi mimal leh chhungkua; Mizoram chhunga lo thleng tak tak tûr hian thinlung takin kan dil thin em? Nge tih dan thana ngaiin kan chham liam satliah mai mai thin tih hi ka zawhna tam ber a ni fo bawk.
Mizoram tana thalai tam tak te’na kan thil thlir (Vision) tam tak hi tu pâ thil thlir (Dream) ang lo takin hlawhtling thei se chuan Mizoram hian hmâ a sawn tawh ngawt ang. A sâwn lo a nih vêk pawhin a hniam tawh fû ang. Mahse, Mizoram tana thil tha duhtu thalaite (Vision) chu tu pâ (Dream) nena va khaikhin chi pawh va ni suh. “Dream chu dream a ni a, kan tih hlawhtlin leh si te chuan dream a ni nang,” an tih ngawt ang kha chu a ni ve lovang. thalai thluak chak tam takte thluak that laia MIZORAM tana ding tûra kan hman tangkai loh chuan an upat fê hnuah an thluak kan chhawr duh leh si ang a, “Changêla nghathu vawm bur tum” an sawi thin kha kan iang zo ang tih a hlauhawm, a theih tawh dawn dêr si lo.
Pawn lam lan dan chauha mâwi tum te, tangkaina nei miah lova sexy tak taka social media-a inpholan te, kekawr tla lek lek hak te, zahmawh lang dâwn khawpa kap tawi tak tak hak te, hrawk bâwk lang tep khawpa T-shirt hmachhing hak te hi changkanna a ni lo a. I changkàn leh kàn loh tehna tha ber chu i mizia (Personality) ah a ni zawk. Kan mize thatna hmangin mahni kan invawng a, kan tih âwm leh âwm lo te kan thliar hrang a, kan thawmhnaw inbel tûrah pawh kan fimkhur thin. Pathian rawngbawltu te’n, “Simple living, high thinking” an tih fo thin kalsanin, “High Living, low budget” kan ni tan tawh a nih hi! Hawh u, inbêng harh ila, kan ram tlu chhe mek tungding leh tûr hian kan pheichheh i her rem leh hrat teh ang u. Ka thalaipuite u, kan ram tluchhe mêk hmu reng chung hian chempui hi kan dah tuiêk mai mai dawn em ni le.