Congress Thalai chuan an tihhlawhtlin ngei tur leh an tih theih ngei tur chauh an sawi thin tih sawiin, nakkum MLA inthlanpuiah sorkarna an chan chuan kut hnathawktute ngaih pawimawh a nih tur thu MPCC President Lalsawta’n chiang taka a sawi chu ram mipuite tan innghahna tlak a nih thu an sawi.
An thuchhuahah, Ningani zana Student Self-Support Union (SSU) Gen. Hqrs.-in Vision 2023 an buatsaiha Congress party aiawha telten an party manifesto ‘Tang puihna’ chungchang bakah corruption tihbo dan tur chiang taka an sawi chhuak chu lawmawm an tih thu an sawi a. Tang taka hnathawkte leh tan ngaihna hre lote tan pawh Congress sorkar chu a awm dawn tih an sawiin, he programme a hlawhtlin ngei theih nan mipuite thlawpna an ngen.
MPYCC hian thalaiten eizawnna ngelnghet an neih theih nan inzirtirna leh ruahmanna pawh an President Lalsawta ho hian buatsaih mek anih thu an sawi a. “Kan ram economy siam thatna tura policy duan pawh mi rinawm, taima leh tumruhna nei ten an hlawhtlinpui ngei theih nan ram pum huapa puanzar chhoh mek zel a ni,” an ti.
Hetih lai hian ruling party, MNF ber Vision 2023 programme-a an tel lo chu pawi an tih thu sawiin, “Policy mumal an neih lohzia leh thu an lo tiam tawh tam takte tihhlawhtlin an la neih mang loh avanga mipui hmaa inlan ngam lohah kan ngai,” an ti bawk.