Mizoram a mixed martial arts inelna lian Ningani zanah Dawrpui Multipurpose Centre-ah buatsaih a ni a. Mizoram Fight League 2-ah title fight neih niin ngaihven hlawh featherweight-ah Chite Veng tlangvang Zarmawia’n unanimous decision-in Sihphir fighter Lalmuanpuia a hneh.
Inelna pahnih a champion
Kum 24 mi Zarmawia hi mixed martial arts huanga vawi 18 a chakna niin tum khat a tlawm tawh a, October khan LPS Pro Muaythai welterweight champion a ni tawh. Lehlamah MMA a luhchilh atanga Muanpuia tlawm hmasak ber a ni ve thung a, a hmain vawi hnih a chak zawn hman.
Round hmasa berah kum 25 mi Muanpuia’n beiseiawm takin a khel a, a vei lama chiang taka a hnek fuh bakah paih thluin a pet zui. Mahse round hnihna atangin tawn hriat nei tha Zarmawia a insiam tha a, kuai thluin a bawhbet bakah thut betin a hnek a, round hnuhnung berah Muanpuia’n paih thluin bawh zui mahse Zarmawia tal chhuakin che thei lovin a kuah bet a, tharum hmanga hneh zawk a nih bakah thiamna nei zawk a nihna a lantir tel. Judge pahnihin 29-28 ve vein an chaktir laiin pakhatin 27-25-in a chaktir bawk.
Chak dan sawi hlawh
MFL2 a title fight dang Bantamweight-ah inhnial theih takin Seling fighter Nunpuia a champion a, unanimous decision-in Lalnunsiama, Lunglei Rahsi Veng a hneh.
A tir atanga a umtu ni tluan zak Nunsiama a lungawi lo hle a, round hnihnaah a bawhbeh bakah chawi kangin fuh taka a hnek bakah a nawr bet hneh viau a, round thumnaah amah ang bawka kum 30 mi Nunpuia paihthluin a bawhbet tluan.
Mahse, round khatnaah Nunpuia’n vawi hnih a paih thluk bakah a bet zawka a tan laiin awmze neiin a bei let thin a, judge pakhatin round tin chak tir vekin judge pahnihin 29-28 ve vein round hnih an chaktir a, tharum nei zawk leh huaisen taka beitu Nunsiama’n a tlawm dan a pawm lo va, sawiselna theh luh ngei a tum.
Bantamweight champion thar Nunpuia hian MMA a khelh vawi ngana niin a chak vek a, Nunsiama erawh a vawi thum nan a tlawm a, tum 14 a chak tawh.
Nazareth-a hun a thleng
Flyweight-ah phu takin Zemabawk tlangval Nazareth Lalthazuala a champion a, round tinah Kulikawn fighter Lalhmangaihzuala a bawhbet vek bakah a khawih hnem zawk. Heti chung hian split decision-in a chak a, judge pahnihin round tinah an chaktir vek laiin pakhatin 29-28-in Hmangaiha a chak tir ve thung.
Kum 21 mi Thazuala hian round hmasa berah amah aia kum khata upa chawi kangin chhuatah a paih hnuah a bawhbet a, a khupin a nakah a do nasa hle bawk. Hmangaiha’n a kein a kherh bet ve thung. Round hnuhnung pahnihah thil awm dan a danglam lo va, Thazuala’n elh tluin a lu-a a hneksak bakah a bawhbet a, lehlamin rek ve mah se tal chhuakin a chak zawk tih chiang takin a lantir tluan a ni.
Pro Muaythai title fight-ah hnehna chang zo lo mahse |hazuala’n Mizorama MMA title hlu ber la in he inelnaah hian vawi nga a chakna a ni a, vawi khat tlawmin mi pakhat nen an inhnehtawk tawh. Kum 22 mi Hmangaiha tlawm vawi hnihna niin tum kua a chak tawh naa tawn hriat nei zawk a nihna a chhawr thei lo.
Strawweight lal thar
Strawweight-ah chungnung takin Model Veng fighter Lalrosanga a inlan a, round tin la vekin ST Rakho, Siaha lakah a chak. Tharumah an inngam tawk hle laiin chhuata inchaiah kum 25 mi Rosanga’n thiamna tha tak lantirin a tibuai a, kum 22 mi Rakho chuan a kuttum hman tangkai tum viau mah se awmze nei thamin a hnek thei lo.
Hun kal tawhah tum hnih tlawm tawh mahse Rosanga’n a vawi sarih nan MMA huangah hnehna changin MFL 2 fighter tha bera thlan a ni a, vawi 10 a khelhnaah a tum hnih nan Rakho a tlawm a, vawi riat a chak tawh.
Intum dangte
Strawweight pathumna inchuhah Hunthar fighter Israel Lalrinawma’n round hmasa berah hneh takin inbeihna a awpbet a, round hnihna tan a nih rualin Imanuel Lalhmahruaia, Zuangtui a inhnukdawk.
Flyweight-ah a bitum tur a inlan loh avangin Jacob Lalpekhlua, Lunglei Zobawk chu pathumna a ni a, bantamweight-ah David Lalmalsawma, Kulikawn chuan round thumna laihawlah Lalramsanga, Upper Sakawrdai a nuai tlawm a, technical knockout-in a chak.
Welterweight-ah title chuha inbeihna huaihawt ni lo mahse Mizo tlangval leh Assamese fighter an inhmachhawn a, Frankie R Lalmuanpuia, Biate chuan round khat hmang zo lovin Gaithui Gangmei, Silchar a hneh a, round khatna tawp lamah a kut la fuhin a elhsak a, harsa lo takin a chak.