Mizoram Cooperative Forum (MCF) chuan Mizoram Cooperative Development Council (MCDC) chu National Cooperative Development Corporation (NCDC) anga siam ngei turin sorkar an ngen.
MCF hruaitute chuan nimin khan Aizawl Press Club-ah chanchinbumite an kawm a, MCDC pian chhuah dan an sawifiah a, din a nih hnuah an beisei dan erawh a phak tak loh thu an sawi.
Kum 2008-a MLA inthlanpui neih a nih dawn vel khan MCF chuan political party zawng zawngte chu an tlin huna Cooperative Development Council siamsak tura an ngen vek thu MCF Chairman Vanlalchhunga chuan a sawi a, “Congress sorkarin kum 2012 khan council dinna tur dan chu Mizoram Cooperative Societies Rule-ah min dahsak ta,” a ti.
Vanlalchhunga chuan chuan MCDC din ni mah se MCF-in an beisei dan erawh a pha ta lo tih sawiin, MCDC chu National Cooperative Development Corporation (NCDC) anga Financing & Promoting Council ni thei tura dan (act) hmanga siam ngei turin Mizoram sorkar an ngen tih an sawi a, MCDC chu an beisei anga din a nih hunah chuan cooperative movement zarah state economy hian nasa taka hma a sawn phah an rin tlat thu an sawi bawk.
MCF chairman chuan Mizoram Cooperative Societies Act chhunga ‘Mi tumah Cooperative Management Board-ah a zawnin tum hnih aia rei an awm tur a ni lo’ tih chu a pum puia hman a rem lo nia an ngaih thu an sawi.
District leh state level-ah chuan he dan hi a hman theih ang a; mahse, primary society-ah erawh hruaitu tur indaih lohna a nasat thin avangin buaithlakna a awm tih a sawi a, dan chu primary society-in an hman ve lohna tura siam thar an duh a, dan hi siam that a nih theihna turin tunah sorkarah an thlen mek a, an ngenna chu sorkarin a tihhlawhtlinsak ngei pawh an rin thu an sawi a ni.