Aizawl: Congress thupuangtu, Dr Lallianchhunga chuan, “MNF sorkar hnuaiah hnam angin kan zahawmna kan hloh zel,” tiin, MNF sorkar hotuten India ram Kristiante thlamuanpui tham thil engmah tih an la nei lo niin a sawi.
Nimin khan Congress Bhavan-ah thu sawiin Dr Lallianchhunga chuan, kum 2014 atanga BJP-in sorkar laipuia sorkarna a chan atangin kristian missionary-ten boruak danglam tak an tawng chho ta zel a, tunah chuan India ram hi khawvelah kristiante tana ram him lo top 10-ah a lang chho ta zel niin a sawi.
Congress party hian Kristiante tana thlamuanpui tham sorkar an lo din tawh chhunzawmtu an awm lo chu pawi a tih thu sawiin, “MNF sorkar hotuten India ram Kristiante thlamuanpui tham thil engmah tih an la nei lo hi a mak hle,” a ti.
MNF sorkar hnuaiah hian hnam anga zahawmna hloh zel a hlauhawm tih sawiin Dr. Lallianchhunga chuan, “Congress sorkar pawh kha Central BJP sorkar hnuaiah kum li (2014-2018 ) chhung lai a awm ve tho a; mahse, MNF sorkar ang hian union minister-te sawiselna leh zilhna a tawk ve lo; Mizoram CM Pu Lal Thanhawla kha an zah em em zawk a ni,” tiin, central sorkar hotu, BJP hruaitute khuan MNF sorkar hotute hi an hriatchian em avangin zahtlakah an ngaih lohzia a lan bakah, MNF MLA fel tak tak nia hriatte pawh Chief Minister Zoramthanga hnuaiah chuan an thatna leh felna ram tan an lantir thei lo niin a sawi a. MNF hotute hi mipuiten zawhna an zawh ve theihna hmun talk show-ah pawh an inlan ngam tawh lo niin a sawi bawk.
Dr. Lallianchhunga chuan, “Hnam anga kan zahawmna humhim tur leh kan ram, kan hnam leh kan sakhua humhim turin a lu ber, chief minister a awm tur hi i fimkhur teh ang u,” tia sawiin, “Congress party-in Mizoram mipuite hnena pek kan duh chu sum leh pai enkawltu rinawm, eirukna lak atanga fihlim chiang sa Pu Lalsawta a ni. Eirukna (corruption) lak atanga fihlim sorkar Mizoram mipuite min dinsak turin political party leader zingah Pu Lalsawta aia tling leh tlak (qualify) an awm lo. Pu Lalsawta hi enchhin chawp ngai ve lo party hruaitu awmchhun a ni,” a ti.
Hnam dangte lakah Mizote zahawmna humhim a ngai tih sawiin, “Tuna MNF sorkar hi chuan hnam dangte lakah min mualphopui zel dawnin a lang. MNF sorkar hi Lal Saula hun hnuhnung ang mai a ni a, a che fuh thei tawh lo,” MPCC thupuangtu hian a ti bawk.