Aizawl : National OB Meeting-ah BJP Mizoram Pradesh President Vanlalhmuaka chuan Mara Autonomous District Council (MADC) leh Chakma Autonomous District Council (CADC) chungchanga harsatna a thlen bakin, nakkum MLA inthlan lo awm tur thlirlawkna an nei bawk.
December 5-7, 2022 chhung khan Delhi-ah National OB Meeting hi neih a ni. He hunah Vanlalhmuaka hian MADC leh CADC chungchanga harsatna an neih chungchangah central hruaitu nen inrawn khawmna an nei a, harsatna awm te chingfel thuai an tum thu an sawi.
MLA General Election 2023 lo awm tur thlirlawkna neiin, Mizorama BJP sorkarna a awm theihna tura hmalak dan tur te sawi ho a. Mizoram mipui ten Prime Minister Modi kaihhruai BJP sorkarna hnuaia hmasawnna hrang hrang an dawn theih ngeina turin sorkarna siam tura hma lak a ni dawn niin an sawi bawk.
Vanlalhmuaka hian tun hnaia Mizoram tlawha lo zin Union Minister hrang hrangte a kawm nghal bawk a. Railway Minister Ashwini Vaishnaw hnenah Mizorama railway hmalakna avanga zangnadawmnaa harsatna nei ten zangnadawmna an hmuh thuai theih nana hma laksak tura ngenin, Railway Minister chuan harsatna awm te chinfel tur a hma lak a thuai anih tur thi a lo hrilh a ni.
Kailash Choudhary, Union Minister of State for Agriculture and Farmer Welfare changtu chuan Mizoram farmer-te’n hamthatna an dawn tur ang a taka an dawn theih nan hmalak a ngaih pawimawh thu lo hrilh.
John Barla, Minister of State in the Ministry of Minority Affairs of India chuan Mizoram a rawn zin tum a, a department chan Minority hnuaia hmalakna hrang hranga thil fello tam tak awm chu pawi a tih thu leh ngaihzam anih loh tur thu a lo hrilh bawk.
Minister for Housing and Urban Affairs changtu Kaushal Kishore kawm bawkin, UD&PA hnuaia PM Housing For All (PMAY) a insak tanpuina dawng tu tur Mizoram sorkar in list an siam leh central list a in mil leh mil loh enfiah tura hmalak a nih tur thu an sawi dun a. PMAY kaltlanga in sakna dawng tur dik tak te’n an dawn theih nan BJP Mizoram chuan theih tawp chhuahin hma lak an tum thu an sawi bawk.