Aizawl: Coordination Committee on Traffic Management chu Home Minister Lalchamliana kaihhruaiin nimin khan thukhawm a, kumin Krismas leh Kumthar vuakvetah Aizawlah ‘No Vehicle Zone’ siam leh an rel.
Thutkhawmah hian kum danga tih thin dan angin kumin Krismas leh Kumthar vuakveta ‘No Vehicle Zone’ siam leh rawtna chu ngun taka ngaituah a ni a, siam leh ngei tha a ti a, a hun atan December 23, 24 leh 31, 2022 an ruat a ni.
Two-wheeler taxi intlanchhawk chungchang pawh ngaihtuah a ni a, Aizawl khaw chhungah two-wheeler taxi 3,294 zet a awm tawh thu tar lan niin, inrelbawlna fel zawk a awm theih nan leh traffic tawt lutuk tihziaawm nan two-wheeler taxi pawh group thumah thenin nakkum January 1, 2023 atang chuan intlanchhawk tawh se tih rel a ni bawk.
Aizawl khawpui chhunga Traffic Management/Urban Transport chungchangah thuneitu hlawm pakhat, Unified Urban Transport/Traffic Management Authority awmin UD & PA minister chairman-na hnuaiah awm se, a kaihhnawih hrang hrangte tel bawk se tih rel a ni a. Dan tanchhanin thuneihna leh tih tur mumal takin duan ni se, Aizawl khawpui chhunga traffic management kaihhnawih lianthamah chuan thutlukna leh ruahhmanna siam thin se tih a rel bawk a ni.