Aizawl: Mizoram Synod Inkhawmpui neih meka nimina rorel inkhawmah Mizoram State Lottery titawp tura sorkar ngen rel a ni.
Nimina rorel inkhawmah hian Agenda 25 rel zawh hman a ni a, Aizawl Hmar Presbytery atanga rawtna lut, ‘Mizoram State Lottery tihtawp ni rawh se’ tih chu rorel palaiten tha an ti a, tun hmaa an lo ngen tawh angin titawp tura sorkar ngen leh an rem tih a ni.
Thurel tur chhawp chhuah zinga mi, Mizorama grape thar atanga siam sacramental wine atana hman rawtna thu Champhai North Presbytery atanga lut chu SEC zirchian tura rem tih a ni a, an rawtna nen Synod-ah thlen leha ngaihtuahho tura pawm tlan a ni.
Aizawl West I Presbytery atanga rawtna lut, ‘Mizorama cancer tam ta lutuk hi a lo tlem theih nan awareness campaign neih dan kawng Synod-in zawng rawh se,’ tih chu rorel inkhawm chuan tha a ti a, SEC bawhzui tura tih a ni.
Nimina ngaihtuahho zingah pawh politics chungchang tel lehin politics siam tha tura hmalak rawtna chu SEC-in chak zawka hma la tura tih a ni a, Mizoram Assembly inthlanpui atana tawngtairual rawtna chu pawm a ni a, ruahmanna chu SEC kutah dah a ni.
Synod Inkhawmpui hi Pathianni zana tiak tur a ni a, vawiinah pawh rorel inkhawm neih leh a ni a. Inkhawmpui tan zan atangin zan tin vantlang Pathian Biak Inkhawm neih thin a ni.