United States leh Russia chuan US basketball star Brittney Griner leh ralthuam tawlhtu hlauhawm tak, American tan ina kum 12 zet tang tawh, Viktor Bout chu an inthleng.
President Joe Biden chuan Griner-i hi a him thu leh United Arab Emirates atanga a thlawh haw thu a sawi.
“Brittney-i hi dinhmun thaah a awm a, tha taka awm turin hun leh hmun erawh a duh ang,” tiin White House chuan a sawi.
US-in a thleng nana an hman, Bout-a hi ‘merchant of death’ tia sawi niin Moscow-ah thlenpui a ni tawh tih Russian chanchinbute chuan an tar lang hlawm.
“Zan laiah holam takin min rawh kai tho va, ‘Tho la, i thil lakhawm rawh,’ min ti a, chu zawng chu a ni mai,” tiin Bout-a chuan Russia a thlen hnua television-a thuthar lakhawmtuten an kawmnaah a sawi.
Bout-a hi thlawhna atanga a chhuk hian pangpar bawk kengin amah lo hmuaktu, a nu leh a nupui hnen lam a pan zui a ni.
Griner-i hi February thla khan Moscow thlawhna tumhmunah cannabis oil nen man a ni a, thla hmasa khan penal colony-ah dah tan a ni.
Biden-a sorkar chuan July khan mi tang inthleng turin Russia hi a dawr tan a, Moscow pawhin Bout-a chhuah a nih theih dan tur a dap ve bawk.
Mi tangte hi Moscow leh Washington atangin mi mal thlawhna ve ve hmangin Abu Dhabi thlawhna tumhmunah phurh thlen an ni a, heta tang hian an thlawk haw ve ve.
Russian sorkar chanchinbuten an tihchhuahah chuan team hnih hi an inpel a. Video-ah chuan Russian security services-ten Bout-a hi lo dawngsawngin thuneitu pahnihin chibai an lo buk.
“Russian khua leh tui chu a inah a lo haw leh ta,” tiin Russian foreign ministry chuan thuchhuah a siamah a tar lang.
Oval Office atangin Griner-i nupui, Cherelle-i chuan Biden-a sorkar chu hma an laknaah fakin lawm thu a hrilh.
Saudi-UAE thuchhuah chuan Saudi Crown Prince Mohammed bin Salman leh UAE President Mohammed bin Zayed al-Nahyan ten hma an la tih an tar lang.