Ministry of Tourism chuan kum 2021-22 chhungin ram chhunga khualzin chawikan nan Rs, Vbc 37 a hmang tih Union Minister Prahlad Patel chuan nimin khan parliament-ah a sawi.
Rajya Sabha-a zawhna a chhannaah Patel chuan 2018-19 khan ram chhunga khualzinna lam thil (domestic tourism) atan hian Rs. Vbc 63 hman a nih thu leh 2017-18 khan Rs. Vbc 25 hman a ni tih a sawi a. Heng sumte hi India ram chhunga miten an tlawh tur hmun hrang hrangte cheibawl leh tuaihnum nan hman a nih thu a sawi bawk.
Heng sum hmanna zingah hian chanchinbu, television, online, radio, theatre leh text message-a ram chhunga khualzinna lam chawikanna atana infakna a tel bawk tih a sawi.
“Ministry of tourism chuan media plan buatsaihin campaign hi Bureau of Outreach Communication (BOC), Doordarshan leh National Film Development Corporation (NFDC) hmanga beih a ni a. Campaign hi state thlan bik tana tih ni lovin state zawng zawng tana tih a ni,” tiin minister chuan a sawi.