Tual a thah avanga thiam loh chantir, lung in atanga tlan chhuak pakhat chu kum 15 zet a bikbo hnuah Purba Medinipur district, West Bengal-ah Goa Crime Branch Police chuan khualbuka a thawk lai an man leh ta.
Tualthattu hian a hming leh a pian ni a thlak a, a pian ni atan hian lung in atanga an tlan chhuah ni chu a hmang a. Goa-a khualbukah hna hmuin a thawk a, Bengal thlengin a thawk zui ta tih Zirtawpni khan police-in an sawi.
Jackson Dadel-a hi Bhatlem-a cheng thin a ni a, April 23, 2005-a Altinho, Caranzalem-a cheng, Godwin DSliva-a thah vanga thiam loh chantir a ni.
Mi an thahnaah hian IPC section 449, 302 leh 34 tlawhchhanin Panaji Town Police Station-ah thubuai ziah luh niin a thianpa nen man an ni a, Margao jail-ah tantir an ni.
September 16, 2007 khan Dadel-a leh a thianpa, Rudolph Gomes chu Additional Sessions Court, Panaji chuan DSilva an vih hlum avangin thiam loh a chantir.
Hremna an tawrh tur puan a nih hmain Dadel-a leh Gomes bakah an tanpui mi dang 12 chuan Margao-a tan in gate an tichhia a, guard-te sawisain lock-up chhungah an dah a, an tlanchhuak ta a ni.
Tan in atanga an tlan chhuah avang hian IPS section 224, 323 leh 342 tlawhchhanin Margao Police Station-ah thubuai dang ziah luh leh niin zawn zui a ni ta ngar ngar a ni.
“Jackson Dadel-a hi Digha khua, Purba Medinipur district, West Bengal-ah a awm niin kan hre ru a, hei hi Kolkata atanga km 200 chuanga hla a ni a. Kan thu hriat chu bawhzuiin Dy. SP Suraj Halankar-a kaihhruai Crime Branch police team tirh an ni a, man an ni ta a ni,” tiin Zirtawpnia police-in thu an chhuahah an tar lang.
“Kum 15 zet lo bibo tawh a ni a. A hming a thlak a, Digha-ah hian ‘Rajeev Kashap’ tih hming puin khualbuk pakhatah front office manager niin a thawk mek a. A pian ni pawh tidanglamin tan in atanga a tlan chhuah ni, September 16 a hmang bawk,” an ti.
“Dadel-a hi custody-ah lak niin Margao Police hnenah dan anga hma an lak zui tura hlan a ni ang,” an ti bawk.