ZPM Working President K Sapdanga chuan, nakkum MLA inthlanpui lo awm turah ZPM in thuneihna an chang a nih chuan dan a lal ber dawn a, eirukna a kimki dawn tih a sawi.
Lengteng bial chhung khaw hrang hrang fang tura fehchhuak ZPM hruaitute chu Lengteng South Block ZPM bultumin Kawlkulhah lo hmuah an ni. He hunah thu sawiin K Sapdanga hian, “ZPM party hian inthlan kan inbuatsaihnaah hian thil thenkhat dah nil tum kan nei a, chu chu hleprukna a ni. Tunlai hian hleprukna ai pawi kan hotuten tih an nei a, chu chu thuhruk a ni. Mipuite’n chhiah kan pe khawm thin a, chumi chhiah tlingkhawm chu budget kan tih hi a ni. Chumi tlingkhawm chu tunah hian a chahbi kawltute’n an hlepru mai ni loin an thukru duh a ni,” a ti.
K Sapdanga hian, vantlang sum thuhtuk hi ZPM a sorkar hunah pawh let leh vek an tum tih sawiin, “Mihring thain a thei kher lo ang; mahse dan in a thei a, court-in a thei a ni. ZPM a sorkar chuan dan a lal ber dawn. Danin ro a rel dawn a, dan a zalen ber ang a, corruption a kimki ber dawn a ni. Chu chu ZPM chuan kan tiam a ni,” a ti bawk.
ZPM in nuai bo an tum leh chu last minute politics a ni tiin K Sapdanga hian, inthlan dawnah ipte chei ak a, thim hnu atanga feh chhuakin hum neia chibai semin vote zawng thin pawl thenkhat an awm niin a sawi a. Party thenkhatten sum an sem hnem ber a nih pawhin ZPM chuan tha hman hnem ber a tum tih a sawi a. ZPM chu thawk tam turin an inzirtir a, sorkar thar an tuaknaah pawh thatchhe tura inzirtir a sum fai sem pawl leh taima tura inzirtir a hnathawk tura infuih a thlai thar lei tumte an indo dawn niin a sawi.
He hunah hian F. Rodingliana, Consultant, leh TBC Lalvenchhunga, PAC member, ZPM General Headquarters te pawhin thu an sawi bawk.