Aizawl : Nimin khan ZPM hruaitu thenkhatten Mamit Luangpawla Residential Sports School Complex sak mek an tlawh a, hnathawh dan hrang hrangte an en.
ZPM hruaitute sawi danin, tun dinhmunah hna thawh a tha thawkhat a, chutih rualin sum sen tawh zat Rs. nuai 1000 chuang atanga chhut chuan hnathawh a chak tawk lo deuh niin an sawi a. Mamit district thalai te leh infiamnain hma sawn zel theih nan tha taka thawh zel an beisei tih sawiin, hnathawh a that a, hmasawnna ruhrel tlo leh tling a nih theihnana a hmun thu mipuite’n hna thawh enpui tura ngenin, ZPM pawhin theihtawp chhuaha enzui zel an tum thu an sawi.
Phairothanga, General Secretary chuan, hmasawnna hnathawhte endik turin engineer leh hnathawktu dang te hlawh neiin rawih an ni a, an mi rawih te kut phuar sak an ni thin hi pawi a tih thu a sawi a. “Sorkar berin a tih tur a tih loh a, a tihloh tur a tih thin avangin tlawmngai pawl te chetchhuah a ngai thin te hi kalphung dik lo a ni,” a ti.
ZPM thuchhuah danin, Mamit Luangpawl rama Residential Sport School Complex sak mek hi a senso tur zat pawh hriat dan chi hnih, Rs. nuai 3,286.34 leh Rs vbc 24.16 a awm nia hriat a ni a; tun dinhmunah first instalment Rs. nuai 1,478.85 pek tawh nia hriat niin, a hnathawktu hi Edufice Infraservices Pvt. Ltd., New Delhi te an ni.
He complex-a ruhrel (main component infrastructure) awm tur te chu: Apartment pariat bakah Academic school, Boys & girls hostel, staff quarters, Principal qtrs, multipurpose qtrs., guard house, basketball leh volleyball court pakhat theuh bakah he school compound hi hung chhuah vek tur a ni bawk.
ZPM hruaitute hi General Secretaries Phairothanga leh R Lalchhuanmawia, Secretaries BC Tawna leh PC Vanlalruata te hi Mamit-a ZPM hruaitu thenkhat ten an tawiawm a ni.