Azl: Mamit atanga thudawnnain a sawi danin Rokimi (51), Luangpawl, Mamit leh a tupa kum 7 mi tun thla ni 7-a thattua nia rin, a chin hriat loha bo zui ta, Rokimi pasal Roliana/Liantea (36) chu Inrinni tlai dar 5:50 vel khan Mamit thlang lama thlam pakhatah thi-a hmuh a ni.
Liantea ruang hi nimin khan postmortem a nih hnuah vui a ni tih Mamit atanga thudawnna chuan a sawi.
Tarlan tawh angin Rokimi leh a tupa hi an chenna inah thia hmuh an ni a. An taksaah hreipuia chehna hnuhma nia ngaih theih leh an ruang bulah hreipui thisen kai hmuh a nih avangin chehhlum nia ngaih an ni.
Rokimi pasal, kum 36 mi, Myanmar mi nia sawi chu a chin hriat loha a bo zui nghal avangin tualthattu ni ngeia rin a ni a. Police leh khawtlangin an zawn zui hnuah Inrinni tlai khan Mamit ram chhung, Tuidai thlanga mi thlamah chemtea bawha thia hmuh a ni a, chemte hmanga amah leh amah intihlum ni ngeia rin a nih thu thudawnna chuan a sawi bawk.