Aizawl : Parliament thutkhawmah Rajya Sabha MP K Vanlalvena chuan Uniform Civil Code Bill, 2020 put luh chungchangah vote a thlak ve lo. He bill hi a thlawp ve loh thu a sawi.
December 9, 2022 khan BJP Rajasthan MP Kirodi Lal Meena chuan The Uniform Civil Code Bill, 2020 chu private member bill anga a put luh chu eptu party te’n nasa takin an duh lohna auchhuahpui hnuah, Rajya Sabha Chairman Jagdeep Dhankhar chuan vote lak a rawt angin vote thlak a ni a, bill thlawptu member 63 awmin, thlawp lo tu chu a tlem zawk niin member 23 chauh an awm avangin bill chu an pass ta a ni.
The Zozam Times zawhna chhangin K Vanlalvena hian, UCC bill put luha sawi ho a nih lai khan a awm loh thu a sawi a. Member kan awm mang tawh loh hnu, member 100 pawh tling tawh lo an la awm tihah put luh chauh a nih thu sawiin, “Member tam laiin an pu lut duh lo ni berin a lang,” a ti.
K Vanlalvena hian parliament thutkhawm hi chawhma dar 11-ah an tan thin tih sawiin, bill put luh ni pawh khan a tan tir lamah a awm thu a sawi a. “Ka ke na avang hian ka thu rei thei thin lo a, chhun dar 12 thleng chu ka awm. Darkar khat vel ka awm hnuah ka haw a. Vote thlak lai hian ka awm ve lo,” a ti.
UCC bill buka vote thlaknaah awm pawh ni se, thlawp a tum loh thu sawiin, “Kan thlawp dawn lo a. Kan ram tan a thatna a awm lo a, a that lohna tak chu ka la sawi thei mai lo nain, he bill hi kan ram tan hian a tulna a awmin ka hre lo,” tiin K Vanlalvena’n a sawi.
Tun dinhmunah rih chuan UCC bill thlawp loa dodalna auchhuahpui dan tur chu a la sawi thei mai lo nia sawiin, “A la hlimchhawn deuh a. Chubakah, he bill kalpui an tum dan te, bill-in a ken tel leh a chhungah eng nge inphum dawn tihte hriat a la ni lo a. Engpawh nise, kan la chai dawn chauh niin a lang,” tiin The Zozam Times a hrilh.