Kar kal ta Zirtawpnia inthlan result a chhuah fel khan BJP mite chuan chak lawmin halpuah leh halmawi an hal a, Patel-a chu pangparin an theh nasa bawk.
Gujarat inthlan hi thawh hnihin, December 1 leh 5-a neih niin BJP hian record siamin hnehna an chang.
Patel-a hi Ahmedabad khawpuia Ghatlodia-ah chuhin record siam thovin hnehna a chang.
Hnehna an chan hnuah ‘Gujarat mipuiten Narendra Modi-a kaihhruaina leh hmasawnna politics a khel chu an la ringtawk tih an tilang nawn leh’ tih a sawi.
“Modi-a’n min rinngamna hi mipuite chungah, a te ber thlenga an harsatna chin fel nan kan hmang zel dawn a ni,” a ti bawk.
Patel-a hi Gujarat chief minister atan hian BJP chuan September, 2021-a Vijay Rupani-a a bân khan rin loh takin an thlang chhuak.
Hetih lai hian Patel-a hi a vawi khat nana MLA ni ve chauh niin sorkar hruai turin tawnhriat a la nei lo va, municipal member erawh rei tak a lo ni ve tawh thung.
Chief minister atan hian Modi leh Union Home Minister Shah-a te duhthlan nia sawi a ni.
Gujarat-a sumdawnna khawpui, Ahmedabad-a piang, Patel-a hian politics a khelh hmain civil engineering a zir.
BJP kalphunga pawimawh tak, Rashtriya Swayamsevak Sangh (RSS)-ah a inhmang nasa a, a tlangval chhuah hlim atanga Hindu nationalist organisation-a tel tan tawh a ni.
Patel-a hi Patidar a ni a, an hnam hi lo neitu, politics-a huhang ngah tak an ni a, Gujarat-a cheng zinga 20% vel hi a hnampui an ni.
Patel-ho hian a tlangpuiin BJP an thlawp a; mahse, sorkarah an hnam aiawh an tel tlem thin avangin party lakah hian an lungawi vak lo nia sawi a ni.
Gujarat hi BJP tana state pawimawh a tling a, Modi-a tan pawh prime minister a nih theihna atana pawimawh ber a ni.
Tun hnaia state inthlan hrang hrangte chu kum 2024-a ram pum inthlanpui lo awm tura an party dinhmun tur hriltu ni theia ngaih a ni.
Mi thiamte chuan chief minister atana Patel hnam thlan a ni chu inthlan hmabaka chet chhiatna lian tak pumpelhna tur pawimawh tak nia an ngaih thu an sawi hlawm.