Congress party chuan Synod Inkhawmpuiin hlemhletna do tur leh ram hruaitute khalh ngil tura politics siam that tuma hmalak an tumna chu theihtawpin an thlawp dawn tih an sawi.
Nimina an thuchhuahah MPCC hian Mizoram Presbyterian Kohhran Synod Inkhawmpui vawi 99-na neih zawh taka ram hma lam hun atana fimkhur tak leh ngaihtuahna uluk tak hmanga hlemhletna do tur leh ram hruaitute khalh ngil tura politics siam that tuma chak zawka hmalak an tumna chu lawmawm an tih thu sawiin, theihtawpin a thlawp dawn niin an sawi.
Congress party chuan, “Kohhran kaltlanga kan ramin hmasawnna tam tak kan neih te, kohhranin kan ramah remna leh muanna palai hna nasa taka a thawh avanga remna leh muanna kan neih hlutziate a hre reng a, a ngaihlu takzet a ni,” an ti.
Mizoram hmun hrang hranga Congress Party mipui leh Mizoram mipuite pawh hlemhletna umbo tur leh politics tha leh dik ramin a neih theihna tura kohhran hmalakna tihlawhtling tura theihtawp chhuah tura ngenin, “Kan President Pu Lalsawta’n sum chakna chhu chat tur leh MLA candidate-te tihautak lo turin Mizoram mipui a ngenna leh Congress party-in hma a laknate min hriatsak tur leh min tawngtaipui turin Mizoram mipui kan ngen a ni,” an ti bawk.