India-a police-te chuan nikuma app siama Muslim hmeichhia 80 chuang online-a zuara an puh chu a chungthu court-ah ngaihtuah a ni dawn tih an sawi.
Delhi Lieutenant-Governor VK Saxena-a’n kum 25 mi, Aumkareshwar Thakur-a hi court-a a chungchang ngaihtuah phalna a pek hnuah police hian an puang zui.
Open source app pakhat, Sulli Deals hi web platform pakhat, GitHub behchhana July, 2021-a tihchhuah kha a ni.
Thakur-a hi January, 2022 khan man niin March thla khan bail-a chhuah a ni leh tawh.
Thakur-a hi computer applications-a degree nei niin Indore, Madhya Pradesh-ah Delhi police team-in an chhuina atanga an man a ni.
Police hian Indian Penal Code, Information Technology Act leh Criminal Procedure Code hnuaia section hrang hrang bawhchhiaa puhin a lakah thubuai an ziak lut.
Lieutenant-Governor -in a chungthu ngaihtuah phalna a pek hmasak a ngaih chhan hi CPC Section 196 hmanga thubuai an ziah luh tel vang a ni a. He dan bawhchhiaa puhte hi ‘ram do zawnga che’ tihna a ni a, mi mal thil ai mahin sorkar mi pawimawhte an ni thin a, phalna lak hmasak a ngai a ni.
Sulli Deals-ah hian Muslim hmeichhe thlalak leh an chungchang hrang hrang tar lana zawrh a ni a, ‘deals of the day’ tia zawrh chhuah an ni.
Thakur-a hi kum 20 mi, Neeraj Bishnoi-a nen man niin ani hi Bulli Bai app siamtua puh a ni a. GitHub atang thova pek chhuah niin Muslim hmeichhia 100 chuang thlalak tar chhuah a ni.
Heng app pahnihah hian hmeichhiate hi zawrh tak tak an ni lo va, Muslim hmeichhiate deusawh leh hmuhsitna atana tih a ni a. Prime Minister Narendra Modi-a kaihhruai Hindu nationalism kalpui nasa BJP an sorkar hnuah hetianga chetna hi a tam zual nia sawi a ni a, sorkar erawh chuan a pha.