Aizawl : Nimin khan ZPM chhung inkhawm neih a ni a; Pu Haukhuma Hauzel (IAS Rtd.), Consultant chuan thusawiin, “Dan lo anga tih hi dan a ni ta ber, kuhva ro tawlhruk chungchangah pawh a ni tho, a lungawi thlak loh hle,” a ti.
Pu Haukhuma Hauzel chuan, “ZPM hi political party naupang te a ni a, mahse a thang duang hle. Hei hi a chhan ber chu a thiltum, a policy leh ideology, kalphung thar mipui sawrkar tih te hian mipuite suangtuahna (vision) ah hmun a chang sang hle. Tunlai hian khawi hmunah pawh kal ila, taxi driver te, dawr nghak te, awmpui (domestic worker) te chuan ‘ZPM ka vote dawn, kan ram siam tha turin an hotu te leh thawktu te hi rin ngam an ni’ an ti a. ‘Vawiin thlenga kan ram hruaitu te hian hmasawnna chhenfakawm leh tluantling min hnutchhiah tlem hle a, kan retheih ngaiin kan rethei reng a ni’ an tih te hi hriat tur a tam hle,” a ti a. “ZPM-in hmalak a tum dan kalkawng atan, kalphung thar mipui sawrkar tiin hmasawnna tluantling a awm theih nan Sustainable Development & Reform Policy (SDRP) a siam ta a ni. Ram rorelnaa Pathian ram tundin tih te, rorelna dik leh tha, party bil sawrkar ni lova mipui sawrkar din tih te hian mipui rilru a hneh em em a ni,” a ti bawk.
ZPM consultant chuan, “Politics inkaihhruaina mumal zawk duhin Kohhran hial a auchhuak a, eirukna do an rel a, MKHC pawhin kuhva tawlhruk leh kuhva hralhna chungchanga hma la turin Union Minister Pu John Barla hnenah an lo thlen a ni. Pathian thu sawiten kan ram rorelna fel lo chungchang a ruhlang rawtin an sawi a, CYMA rorel inkhawmah pawh eirukna do an rel bawk a ni,” a ti a. “Kan environment humhalhna dan chu sawrkarin hreh tak chungin a appeal a, tunah chuan compensation duhtu te nawrna avangin a lo hnukdawk ta a. Hei hi tha ti lovin pawl thenkhatin hma an la mek a ni. Tuna kan kaldanah hi chuan kan environment aiin compensation umtu ten ngaihpawimawh an hlawh zawk tih theih hialin a lo awm ta a ni,” a ti a. “Tunlai kan ramah mimal induhsakna leh uchuak taka sum insiamsak tawnna a hluar em em a, dan lo anga tih hi dan a ni ta ber, kuhva ro tawlhruk chungchangah pawh a ni tho, a lungawi thlak loh hle a ni,” a ti a. “Party leader pathumte media lamin an kawmnaah khan Chief Minister ni tawh pahnihte chuan an chhang pial a nih kha. Kan hotute erawh hi chu eiruknaa fihlim, eiru lo tur leh a do tura intiam ngam an ni a, hei aia innghahna tlak a awm lovang. Party pawhin eirukna do chungchang hi policy buah a dah a ni,” ti bawk.
ZPM chhung inkhawm, Pu RL Liantluanga, Chief Organiser kaihhruaiah hian Rev. Darchungnunga, ZPM Tawngtai Pawl Chairman chuan hunserh a hmang a; Pi Alinery Lalngilneii Lianhlawng pawhin thu a sawi bawk a ni.